سهام البارودي كود//
أنا شخصيا مع حرية التعبير ولكن طبعا ماشي مطلقة، حرية التعبير خاصها تكون للناس لي كاتآمن بيها فقط! صافي! أما الظلاميين والسلفيين والإسلاميين بصفة عامّة ماكايستاهلوش حرية التعبير حيت ماكايآمنوش بيها! نهار يكون عندهم البوڤوار، البعابع لا شي واحد قدر يحل فمّو ويعبر على رأيوو، هوما باغين يدخلو معاك جنب فكلشي، فشنو كاتلبس، شنو تاكل، كيفاش تمشى، شنو تلبس مرتك، كيفاش دخل للطواليط، كيفاش تشري الدار، واش تسمع الموسيقى ولا لا؟ كلشي خاشيين فيه كرموصتهم وباغين يفرضو على عباد الله كيفاش يعيشو، آشمن حرية التعبير كايآمنو بيها هادو.
ولكن حاليا فالمغرب الظلاميين والمتطرفين كايتمتعوا بحرية كبيرة، وكبيرة بزاف، الڤيديوات ديالهم معمرين السوشل ميديا، ها لي كايفهم فالعيالات، ولا لعمل المرأة وأختاه حجابك، ها لي ولا كايفهم فالمعاملات المالية، ها لي كايفهم فالعلاقات الزوجية… عرّام ديال الفيديوات عامرة بالأفكار الظلامية والمتطرفة ضد النساء وضد الأقليات وضد التوجهات ديال ملك البلاد وهاكاك عايشين بيناتنا يأكلون الطعام ويمشون في الأسواق وحتى واحد ماديرونجاهم.
فمجتمع فحال هذا، عدديا الإسلاميين فايتين فيه الحداثيين، راه من العادي والطبيعي، بل من الصحّي والضروري تكون إنسانة فحال ابتسام لشگر، لي كاتعبر على أفكارها بكل شجاعة وحرية، واش عرفتي شنو هي تكوني ابتسام لشگر فالمغرب؟ وا غا باش تكوني مرا! غا مرا عادية فالمغرب راه صعيبة وصعيبة بزّاف، كلشي حاضيك، كلشي مقابلك كلشي كايمارس الوصاية عليك، حسبلّاك تكوني مرا معرية على اللّاص ومقطعة الوراق فحال ابتسام، صعيبة وصعيبة بزّاف، كمية الإهانة والتنمر والسبّان والمعيور لي كاتعرض ليه ديك البنت وباقا باقا عاضّة فبزولة المجتمع! مامفاكّاش !
غا على الشجاعة ديالها أنا بعدا شخصيا كانحتارمها، نقدر نتافق ولا نختالف معاها فكيفاش وعلاش ولكن مانقدر إلاّ نحتارم الشجاعة ديالها.
التاريخ ديال المغرب أكيد ماغاديش يذكر يطو بنت خالتي عيشة لي عاشت وماتت وهي مقابلة الولاد والكوكوط، وماغايذكرش يزة بنت عمّي لي من نهار عقلت عليها وهي كادور عند الشوافات، وماغايذكرش بزاف ديال الطبيبات والمهندسات والمحاميات والقاضيات المغربيات لي ابدلو فالمجتمع والو وبقوة الحشمة ماعمرهم حتى دافعو على حقهم فبلاصة فالحمام حدا الروبيني! ولكن أكيد أكيد غايذكر الشجاعة، السبارطاكيسة بيتي لشگر!