گود سبور//
غير غادي مستوى عدد من اللاعبين الدوليين المغاربة وكايتراجع، قبل أشهر قليلة على كاس افريقيا 2025،هذه المرة المدافع جواد الياميق، مشى وقع مع فريق يالاه طالع للقسم الاول من البطولة السعودية، و 22 عام وهو غايب عليها، الاسم ديالو النجمة السعودي، وسنا معهم عقد فهاد الميركاتو الصيفي.
هذا الشي كايخلي السؤال يتطرح واش ما كانش من الأحسن لجواد الياميق مول 33 عام يضحي شوية من ناحية المادة مقابل الجانب الرياضي، ويرجع يلعب مع الرجا احسن له حيث على الاقل الرجا فيها تنافسية والفريق عندو مشروع، ومنها فرصة تحقيق نجاح يسالي به الكاريير ديالو كبيرة مع نادي باغي يرجع يسيطر محليا وقاريا، ومنها يكون واجد لكاس افريقيا المقبلة.
ما يقع لعدد من اللاعبين المغاربة المحترفين، كايخلي المخاوف تدخل مع الجمهور المغربي، بخصوص كيفاش غايكون المستوى ديالهم مع المنتخب المغربي فكاس أفريقيا 2025، اللي غاتكون فالمغرب شهر ديسمبر الجاي.
ومن غير جواد الياميق، فكاين عدد من لاعبين المنتخب المغربي كايعانيو بزاف حاليا من عدم الاستقرار سوا فالمستوى او الاصابات او انهم ما عارفينش المستقبل ديالهم وهما ركائز، بحال عز الدين اوناحي، اللي مازال كايقلب فريق، وعبد الصمد الزلزولي، وشادي رياض، ونصير مزراوي وهادو موعتين، أما حكيم زياش وامين حارث اللي ما بقاش كايعيط لهم الرگراگي گاع، فالاول ما عندوش فريق ملي تفارق مع الدحيل القطري اشهر هادي، والثاني باغيين مارسليا يصيفطوه بحالو ولكن ما لاقينش له فريق يشري العقد ديالو، اما عناصر اخرى بحال رومان سايس اللي كايلعب مع السد القطري راه تنسات.
وبالمقابل كاينين لاعبين اللي قدرو يقنعو انديتهم بحال سفيان أمرابط مع فنربخشة التركي، ونايف أگرد اللي رجع كايلعب مع ويستهام واخا كاينا شي هضرة على انه يقدر يمشي لفريق آخر.