وكالات//
النجم الهوليوودي دينزل واشنطن رجع يدير الجدل مرة أخرى بعدما صرّح بكلام صريح على “ثقافة الإلغاء” وعلى أهمية جوائز الأوسكار، فواحد الجولة الترويجية ديال الفيلم الجديد ديالو Highest 2 Lowest مع المخرج سبايك لي.
فمقابلة مع شبكة Complex News، سألوه واش كيخاف هو وسبايك لي من احتمال “الإلغاء”، جاوب متعجب: “شنو كيعني يتلغى شي واحد؟” وزاد قال: “شكون مهتم؟ علاش ولا دعم الناس مهم بهاد الشكل أصلاً؟” ولما المذيعة قالت ليه أن “المتابعين دابا بحال عملة”، جاوبها بقوة: “ما كيهمنيش شكون كيتابع، ما تقدرش تسوق وتبقى تابع فـ نفس الوقت.”
ثقافة الإلغاء كتعني أن الناس كيرفضو شخص أو مؤسسة قدام العلن باش يعبروا على الاستياء ويمارسو الضغط الاجتماعي، وغالباً كيتعرضو ليها المشاهير اللي كيديرو الجدل. ولكن واشنطن أكّد أنه ما كيعنيهوش الموضوع وقال: “ما يقدروش يلغيوك إلا ما سجلتيش راسك، ما تسجّلش.”
فمقابلة أخرى مع الصحافي جاك هاميلتون فبرنامج Jake’s Takes، هدر دينزل واشنطن على أنه ما مهتمش بجوائز الأوسكار، رغم أنه ربح جوج مرات وترشّح عشر مرات. قال:
“ماشي على ود الأوسكار اللي كندير هاد المهنة، ما كيهمونيش هاد الأمور، أنا فهاد المجال من زمان. مرات ربحت وما كنتش نستاهل، ومرات ما ربحتش وكنت نستاهل. الإنسان هو اللي كيعطي الجائزة، ولكن الله هو اللي كيعطي الأجر الحقيقي.”
ولما سولوه فين مخبي الجوائز ديالو، جاوب ببساطة: “حدا الباقي”، وزاد: “فنهار الأخير ديالي، هاد الجائزة ما غتنفعني فحتى حاجة.”