محمد احتارين تنادم معه الحال حيث اختار هولندا فبلاصة المغرب: إما المنتخب المغربي ولا بلاش

گود سبور//

تنادم الحال مع المغربي الهولندي محمد احتارين، اللي كان فضل يلعب مع المنتخب الهولندي على انه يلعب مع المنتخب المغربي، وهذا الشي فعام 2019، والندم ديالو جا بعدما تخلاو عليه الهولنديين بسبب المشاكل اللي عاشها بعدما كان نجم واعد وأندية أوروبا مهتمة به وتحول إلى لاعب فالهواة.

وحسب حوار نشرو موقع PZC الهولندي، دارو محمد احتارين مع شبكة ESPN، فقال اللاعب: “إما المنتخب المغربي او بلاش من شي كاريير دولية”، وهذا الشي كايبين شحال ندم احتارين حيث اختار هولندا وما لعبش مع المغرب.

وقال محمد احتارين ايضا فالحوار ديالو، ووضح: “ملي كانت الأمور ما غادياش مزيان كانت هولندا كلها ضدي، وكايشوفوك مغربي، وملي الأمور ديالك كاتحسن كاتولي واحد منهم، وهولندي. هادي هي التجربة اللي عشت”.

وكمل اللاعب المغربي الهولندي، وقال: “أنا اصلي مغربي وكبرت فهولندا، والحب اللي لقيتو فالمغرب من الناس تماك مختلف بزاف، اه راني دابا فهولندا ولكن ما غاديش نعاود نلبس التوني الهولندي نهائيا”.

وكان محمد احتارين اللي عندو دابا 23 عام، (كان) طايح فمشاكل شخصية كبيرة، خلات مستواه يتراجع بزاف، بعدما كان كايلعب مع اياكس وأيندهوفن الهولنديين ويوفنتوس وسامبدوريا الطاليانيين، ودابا كايلعب مع فريق فورتونا سيتارد الهولندي، وكايحاول يرجع للمستوى ديالو.

إقرأ الخبر من مصدره