كود مرتيل////
فالأيام العشرة الأخيرة من شهر غشت، شواطئ مرتيل والمضيق عامرين بالزوار، لكن وسط هاد الأجواء ديال الاصطياف بان مشكل كيعاود يطرحو راسو كل صيف: قشور عباد الشمس “بيباس” اللي ولات كتغطي الرمال وكا تشوّه منظر البحر.
المصطافين كيجلسو قدام البحر كياكلو “بيباس”، ومن بعد كيتخلاو على القشور بلا ما يجمعوها، واللي كيخلي الشاطئ موسّخ، خصوصاً أن الأطفال كيلعبو فالرمال وكيطيحو وسط هاد البقايا.
واحد المصطاف من الدار البيضاء قال لينا: “ماشي معقول نجي نبدل جو ونلقى الرمل عامر بالقشور، خص الجماعة تلقى حل لهاذ الفوضى”.
بينما شابة جاية من فاس علّقات على هاد الامر بالقول: “أنا ما عنديش مشكل نستهلك البيباس، ولكن خاص يكون معاه كيس صغير يجمع القشور، بحال كيف كيديرو فبعض البلدان”.
وحتى بعض سكان المنطقة عبّرو على استيائهم، وقال واحد منهم: “الشواطئ ماشي مزبلة.. اللي بغا يربح من بيع البيباس خاصو يحترم النظافة ويعطي للزبون كيس خاص بجمع القشور”.
هاد الوضعية رجّعات النقاش بقوة على دور المراقبة والوعي الفردي. كاين اللي كيطالب بمنع بيع “بيباس” فالشاطئ نهائيا، وكاين اللي كيشوف أن الحل الأبسط هو إلزام الباعة الجائلين يوزعو أكياس صغيرة، باش المسؤولية تبقى مشتركة بين البائع والمصطاف.
وبين هاد المواقف بقات الحقيقة وحدة: البحر والشاطئ هو متنفس جماعي، واللي خاصو يبقى نقي باش يستمتع بيه الجميع.
