گود سبور//

عبر طارق السكتيوي مدرب المنتخب الوطني المغربي المحلي، على الفرحة ديالو بتأهل المنتخب إلى نهائي كاس أفريقيا للمحليين المقام بكل من أوگندا وكينيا وتنزانيا، واكد ان هذا التأهل جا قدام المنتخب السنغالي القوي فالدومي فينال، وان الأمور كانت صعيبة بالنسبة للمنتخب المغربي ودابا غايتحفزو للفينال باش يربحو الكاس.

وبعد تأهل المنتخب المغربي للفينال بالرباح بالبينالتيات على السنغال 5-3، بأوگندا، فماتش سالا الوقت ديالو الأصلي والشوطين الإضافيين بالتعادل الايجابي واحد لواحد، هضر طارق السكتيوي، وقال فتصريح لقناة الرياضية: “كانبغي هذا الگروب وكايشرفني نكون بيناتهم، عندهم حب كبير لكرة القدم الوطنية وديما العلم المغربي معنا فالفيستيير وما غاديش بخيبو”.

ووضح طارق السكتيوي: “الماتش كان صعيب بزاف ضد السنغال حامل لقب الشان الماضي وعندهم لاعبين بمؤهلات كبيرة إلى حدود الماتش اللي لعبو معنا تسجل عليهم هدف واحد ودازو للدومي فينال عند جدارة واستحقاق وعندهم توازن وكايعرفو شنو كايديرو وسط التيران لا من الناحية الدفاعية ولا من الناحية الهجومية، وعندهم مدافعين قويين بزاف ووسط ملعب كايعرف كايعرف يلعب كورة وكايعرف يلعب بلا كورة وهاجمين سراع كثير”.

وكمل السكتيوي: “الماتش ما كانش ساهل، يمكن حنا بان علينا شويا ديال العيا، وكاتعرفو كثرة الماتشات ما كاينش وقت كثير، واللاعبين، وماتش ورا ماتش ورا ماتش كايزيد هذا الشي يدخل لافاتيگ عند اللاعبين فبان هذا الشي شويا، كذلك السفر اللي كان صعيب بزاف، راه كنا دخلنا لأوگندا حتى 2 الليل والأمور ما كانتش ساهلة وبزاف ديال العراقيل، ولكن راني متشرف بهاد اللاعبين وراني فرحان بهاد الرباح اللي ما جاش ساهل ضد منتخب قوي وانتصار قوي خلانا نتأهلو للفينال وابتداء من غدا غاتكون لاموتيفاسيون عندنا كثر باش نجيبو الكاس”.

للإشارة فالمنتخب الوطني المغربي غايلعب فالفينال ضد منتخب مدغشقر اللي تأهل بعدما ربح السودان فالدومي فينال، وغايكون النهائي بالعاصمة الكينية نيروبي يوم السبت المقبل.

إقرأ الخبر من مصدره