وكالات//
مدير الذكاء الاصطناعي فشركة مايكروسوفت، مصطفى سليمان، حذر من المخاطر ديال الاستعمال المفرط لتقنيات الذكاء الاصطناعي، وقال باللي ممكن يوقع شي حاجة سماها “ذهان الذكاء الاصطناعي”.
سليمان شرح فبعض المنشورات على منصة “إكس” أن كاينين بزاف ديال التقارير اللي كتسجل أوهام مرتبطة بالتفاعل مع روبوتات الدردشة، بحيث بعض الناس كيضنوا أن هاد الأنظمة واعية أو كتقدر تعطيهم قدرات خارقة.
وقال باللي هاد الظاهرة ما كتهمش غير الناس اللي عندهم مشاكل نفسية، ولكن حتى المستخدمين العاديين اللي تأثروا بطريقة المحاكاة الذكية اللي كيديروها هاد النماذج.
ورغم أن “ذهان الذكاء الاصطناعي” ماشي مصطلح طبي معروف، كيتستعمل باش يوصف الحالات اللي الناس فيها كيبعدوا على الواقع حيت كيدمجوا عاطفياً أو ذهنياً مع روبوتات المحادثة بحال “تشات جي بي تي” ولا “كوريك”، وكيظنوا أن هاد الروبوتات عندها مشاعر أو نوايا.
سليمان قال أن الذكاء الاصطناعي كيخلق “وعي ظاهري” حيت كيقلد طريقة التفكير ديال الإنسان، وهاد الشي كيخلي بعض الناس يعتقدوا أن الأنظمة كتفكر بحالهم.
وأكد باللي الذكاء الاصطناعي ماعندوش وعي حقيقي حتى الآن، رغم أن بزاف ديال الناس كيظنوا العكس.