گود سبور//
نجح فريق شباب السوالم وتأهل لفينال كاس حميد الهزاز، بعدما قصى المغرب الفاسي منظم البطولة.
وقدرو شباب السوالم اللي طاحو فالقسم الثاني من البطولة الاحترافية، يتأهلو للنهائي بعدما ربحو المغرب الفاسي بالبينالتيات 4-3، بعدما سالا الماتش بنتيجة التعادل السلبي زيرو لزيرو.
الظهور ديال المغرب الفاسي والمستوى اللي قدم الفريق ضد شباب السوالم، كايخلي جمهور الماص خايف على الفريق قبل ما تبدا البطولة، خصوصا ان المكتب المديري برئاسة محمد بوزوبع غرقوها انتدابات فالميركاتو، وسناو مع عدد كبير من اللاعبين منهم زماگريا ولاعبين سابقين د الرجا والوداد، والى ما عطاوش الاضافة راه خاصو يفك معهم الجرة ولا يلقى الماص غارق بأحكام النزاعات، وهو اللي واعد الفاسيين وجماهير المغرب الفاسي باش الفريق يخرج من الأزمة ويولي يلعب ادوار طلائعيّة.