محمد سقراط-كود///
واش ممكن للمغاربة يعتامدوا على النقل العمومي باش يوصلوا لخدمتهم وقرايتهم ويتنقلوا عامة؟ طبعا لا. النهار لي غادي يبغيو يعتامدوا على النقل العمومي باش يوصلوا لخداميهم وقرايتهم غادي يتوقف اقتصاد البلاد، لأن الدولة وطيلة عقود عجزات انها توفر للمغاربة نقل عمومي متنوع وفعال يمكن يعتامدوا عليه، في المقابل الحل الحقيقي لي ظهر في السوق هو موطورات الشينوا لي حقا فكوا العزلة على بقاع كبيرة في المغرب، وساهموا في تحريك اقتصاد البلاد، سير لأي شانطي ديال البني او مشروع كبير كيف مكان غادي تلقى قبالتوا عرام ديال ماطر شينوا، حيت من غير مواد البناء والرخص راه من الأساسيات في الشوانط هو حضور العمال في الوقت، وهادشي مستحيل يوقع بإستخدام المواصلات العامة الطاكسي والطوبيس، وموطور الشينوا هو لي فك حقيقة هاد الموشكيل.
فاش ضرب الجفاف المغرب ومنطقة الرحامنة في التسعينات اغلب السكان هاجروا لسمارة والشباب هاجروا لاكادير يخدموا في الفلاحة، دواور على قدهم خواو ومنهم لي راب كامل معرالمدة، السنوات الأخيرة كتعرف المنطقة جفاف طويل ومع ذلك الهجرة للمدن كانت قليلة والسبب موطور الشينوا، لي خلى أي واحد في المنطقة يفيق الصباح بكري ويشد الطريق لمراكش يخدم في البني او أي خدمة خرى ويرجع لدارو عن ولادو بالعشية، وهادشي راه في اغلب المدن، الناس مابقاتش ضروري تمشي تسكن في المدينة باش تخدم، يكفي موطور شينوا وهانتا قاضي غاراض، وحاليا في القبيلة راه مكاينش الدار لي مافيهاش جوج ماطر تلاتة وهوما لي خدامين على الأسر تم وحابسين الناس من الهجرة.
في الدخلة ديال أي مدينة كبيرة غادي ييانوا ليك ناس بسطاء داخلين للمدينة هادين الدوزان ديالهم سواء ديال البني او جارديناج او النجارة، وللأسف نهار كتكون شي حملة هادو هوما لي كيستهدفهم الباراج، ماشي هادوك البراهش الشمكارة لي كيدوزو مكابريين جنب رجل البوليس، وطبعا حتى شي بوليسي ماغادي يغامر بخدمتو وحياتو ويحاول يتبعهم او يشدهم، حيت في حالة طاح شي واحد وجا راسو على طروطوار غادي يوليو ولاد البوليسي مشردين، حنا ماشي ميريكان البوليس عندهم نقابة قوية كتدافع عليهم ومتاحدين، هذا المغرب وللأسف فاش فشلات الدولة تطبق القانون قالت اجي ندوز لاسهل فئة الدراوش ونحيد ليهم اهم وسيلة باش كيجيبو طرف ديال الخبز، راه الموشكيل في خرق القانون وعدم قدرة الدولة على تطبيقه بصرامة، ماشي في سرعة الموطور، اذن على هاد الحساب راه كاين موطورات كبار كيوصلوا حتى ل تلتمية في السرعة، واغلب الطوموبيلات كيفوتوا مية وعشرين اذن كولشي الفوريان، راه ماشي منطق هذا اهم حاجة خاص الموطور يكون برخصة سياقة وتأمين مزيان، وآلية لإستخلاص المخالفات، وطبعا موطور غير مطابق للمواصفات مايدخلش للمغرب ومايتباعش، ماشي يدخل ويتباع هاد تمشي تحجزوا عند واحد تقطع باش شراه، فين المنطق هنا.