گود سبور- الرباط//
كشف الناخب الوطني وليد الركراكي انه مازال كايقلب على شيحل لمركز وسط الدفاع فالمنتخب الوطني المغربي، وعلى شي مدافع اللي قادر يلعب فهاد البوسط مع نايف أكرد فالدفاع، واكد بلي ما غاديش يجي حتى بقات 3 شهور على كاس افريقيا ويبدا يرقع فهاد البوسط، وشدد على ان اللي غايلعب فهاد المركز خاصو يكون مدافع اوسط وماشي ظهير.
وخلال الندوة الصحافية اللي اعلن من خلالها الناخب الوطني وليد الركراكي اليوم الخميس على لائحة المنتخب المغربي لمواجهة كل النيجر وزامبيا ضمن اقصائيات كاس افريقيا 2025، هضر الركراكي بصراحة وقال: “ما نقدرش نكذب مازال ما لقيتش اللي يلعب فالدفاع مع نايف أكرد، ونايف دابا هو اللي عندنا والباب مفتوح سوا للاعبين ديال أوروبا او لاعبين البطولة او الخليج”.
وتعقيبا على عمر الهلالي اللي فايت لعب الموسم الماضي مع اسبانيول كمدافع وسط، وانه واش ممكن يلعب فهاد البوسط مع المنتخب المغربي، اكد الركراكي ان اللاعب هو ظهير وهذا هو التكوين ديالو لعب مرة فحياتو فاللكس سونطرال
وزاد اكد الركراكي: “ما غاديش نجي حتى بقات 3 شهور على كاس افريقيا ونبدا نرقع، واه اللي خاص يلعب حدا نايف أگرد خاصو يكون ديفونسور سونطرال، وماشي ظهير “.