وكالات//
حكمات محكمة فبرلين، اليوم الثلاثاء، على ارهابي سوري قاصر بالتهمة ديال المشاركة فمخطط مستوحى من تنظيم “داعش” باش يهجم على حفلة ديال المغنية الأمريكية “تايلور سويفت” ففينّا.
وتم إلغاء 3 حفلات ديال سويفت ففينّا الصيف اللي فات، من بعدما علنات الشرطة أنهم اكتاشفو خطة ديال تفجير انتحاري كانت غادي تستهدف وحدة من هاد الحفلات.
وذكرت المحكمة فبلاغ ديالها أن المتهم اللي عندو 16 العام، واللي عرفوه النيابة باسم محمد أ.، توبع بـ”التحضير لعمل عنف خطير كيعرض الدولة للخطر” و”دعم عمل إرهابي فالخارج”، وتحكم عليه بالسجن 18 شهر مع وقف التنفيذ.
والمحكمة زادت وقالت أن محمد أ.، اللي كان عندو 14 عام ملي تم إحباط الهجوم، “ولا متطرف بسبب دعاية داعش فالإنترنت”، حسب وكالة “فرانس برس”.
وكذلك توبع محمد أ. بتقديم الدعم لمراهق آخر فالنمسا فالتخطيط لهاذ الهجوم، والمحكمة وضحات: “بعث ليه مقطع فيديو فيه تعليمات على طريقة صنع قنبلة، وعرفو على واحد من أعضاء داعش”.
ومحمد أ. اعترف بالأفعال ديالو فالمحاكمة، بينما السلطات النمساوية حبست 3 مشتبه فيهم على خلفية هاذ المخطط، اللي تم إحباطو بمساعدة الاستخبارات الأمريكية، وكانو تلاميذ فداك الوقت.
والمشتبه فيه الرئيسي هو نمساوي من أصول مقدونية شمالية، واعترف أنه “كان ناوي يدير هجوم بالمتفجرات والسكاكين”، حسب الاستخبارات النمساوية.