سهام البارودي – كود//
المرض النفسي كاياخد اشكال متعددة، انا شخصيا كتاشفت منذ مدة طويلة بلي الاغلبية الساحقة ديال المغاربة ماعندهمش الرادار ديال المرض النفسي، ماكايشمّوهش ، طيلمون الامراض النفسية عندنا مستفحلة كو بزاف ديال الناس ماعندهمش الرادار لي كايديتيكتيها.
المغربي العادي كايقسم الناس لجوج ديال الانواع، الأحمق لي كايضرب بالحجر فالزنقة و باقي الناس، و بالنسبة ليه ماتبقى كلهم بعقلهم، كلهم عاديين، كلهم ماعندهم تا مشكل، قادرين يقراو و يتجوجو و يولدو و يخدمو فالتعليم و البوليس و يكونو أطبّاء و قضاة و نجّارة و فراملية… في حين القوادة الحقيقية راه فديك “ما تبقى من الناس” و لي شبعانين امراض نفسية مخفية، حيت اوموان داك الاحمق لي كايضرب بالحجر فالزنقة كلشي عارفو احمق و كايتعامل معاه على اساس انه احمق، اما المرضى النفسيين راه المجتمع كايتعامل معاهم على اساس انهم ناس عاديين و كايوليو آباء و أمهات و كايعطيهم مسؤوليات فمجالات حساسة فحال الطب و البوليس و التعليم …
فحال دابا الحالة ديال سكينة بنجلون، ديك النهار طلع ليا لايف ديال سهام اسيف الممثلة كاتنصحها و تهضر معاها و تناقش معاها فحالا سكينة انسانة بعقلها، و ماشي غير سهام اسيف، جرائد الكترونية و فانزات و ناس بزاف كايحضرو لللايفات ديال سكينة بنجلون و كايتفاعلو معاها و كايسمعو ليها في حين هي فالحقيقة، اكبر خير ممكن يديرو فيها الانسان هوا يديها تتعالج بشكل مستعجل فسبيطار الرازي. السيدة خاصها ماتكون لا فتيك طوك لا لايفات لا يوتوب لا فايسبوك لا شوف تيفي، السيدة بلاصتها فسبيطار الامراض العقلية و النفسية تحت اشراف طبي كاتلقّى العناية و الرعاية لي خاصّاها.
راه ماشي غا حيت سميتها سكينة و كنيتها بنجلون و بيوضة و بوگوصة و قارية و ماكاتشيرش بالحجر فالزنقة فا راها مايمكنش تكون هارب ليها، راه باينة من نهار بدات كاتكتب المنشورات فالفايسبوك على راجلها وولادها باينة السيدة هارب ليها و خاصها العلاج الطبّي، البسيكياطر و و البسيكولوگ و شي ست شهور ديال الطريطمون كأقل تقدير و بيت فالرازي ترتاح فيه و تصنط لعظامها، سكينة بنجلون راه هي هيام سطار كملات قرايتها، نزار السبيتي كون تزاد درية كنيتها بنجلون، سكينة راه فحال النبي سعد الشوفاني، گاع هادو مرضى نفسيين، محتاجين الرعاية فدولة اصلا ماكاتعتارفش بالمرض النفسي و ماعندهاش الوعي باش تديتيكتيه و الآليات و الموارد الكافية باش تعالجو.