گود سبور//
عبر طارق السكتيوي مدرب المنتخب الوطني المغربي المحلي على الشكر ديالو للملك محمد السادس على المجهودات والاهتمام ديال بكرة القدم الوطنية، وشكر حتى فوزي لقجع رئيس الجامعة الملكية المغربية لكرة القدم، واكد ان هذا الشي ساهم في تطور الكرة المغربية، اللي بدات كاتجني تمار هذا الخدمة والعمل اللي تدار خلال 15 سنة الماضية، وان النتائج مازال غاديا تجي.
وخلال الندوة الصحافية اللي كاتسبق ماتش فينال كأس افريقيا للمحليين بين المنتخب المغربي ومدغشقر، هضر طارق السكتيوي، وقال: “كانشكر الملك محمد السادس على كل ما وصلت له كرة القدم الوطنية الان فهي بالمجهودات ديالو وبعدها مجهودات رئيس الجامعة الملكية المغربية فوزي لقجع اللي خدام بنكران ذات كبيرة وواحد حب كبير العلم الوطني والسمعة ديال كرة القدم الوطنية، وولات كرة القدم الوطنية رائدة لا في مجال التكوين لا في القوانين والأنظمة، لا في مجال المنشآت وفي مجالات عدة اخرى، واكيد من ورا هذا الشي ضروري غايكونو النتائج والمفتاح ديال هذا الشي هو الحب الكبير اللي عندنا للعلم الوطني ديالنا والحب الكبير لكرة القدم وهذا الشي كامل باش كرة القدم تبقى رائدة”.
وكمل السكتيوي، وقال: “هذا عمل تدار هادي 15 عام وبدينا كانجميو التمار ديالو، ولكن ما شبعناش وملي كانوصلو لشي هدف كانتحفزو كثر باش نمشيو للقدام فهاد الاتجاه، مرة اخرى شكر كبير للملك محمد السادس، وشكر كبير للناس اللي خدامين وعلى راسهم رئيس الجامعة، وشكر كبير لكل من ساهم فتطوير كرة القدم لا من لاعبين ولا من مدربين”.