كود الرباط//
وصف عبد الاله بنكيران، زعيم العدالة والتنمية، من يقف وراء صفحة “جبروت” على منصة تيليغرام، بـ”الشيطان” للي كيتخبا وميقدرش على المواجهة.
بنكيران، قال اليوم فندوة صحفية مخصصة لتقديم مقترحات البي جي دي حول القوانين الانتخابية، بلي هاد “نتا مخبي وكتقول جبروت محشمتيش.. نتا شيطان لأن الشيطان هو لي كيتخبا”.
وأضاف بنكيران :”كون كنتي جبروت حقيقي كون وقفتي وقلتي انا ممتافقش مع كذا وكذا تقولي تمشي للحبس تمشي..”.
وانتقد بنكيران معارضي اليوتيب بالخارج، وقاليهم :”يلا كانت فيكم شي رجلة دخلو وعارضو”.
وتابع :”قولو علاش قديتي ويلا كان من الضروري تضحي ضحي.. واش كتنتقد السلطة حيث مخديتيش نصيبك وعايش ف اسبانيا وكندا ولا شي قنت وعايش مزيان وبغيتي تولي زعيم.. واش بغيتي تولي زعيم مالك نتا الخميني .. الخميني مخرجش من ايران للي خرجو هو الشاه، ويلا خرجك الملك نقولوها بعدا، اما تعيشي مخير من برا وتبدا تشير ودخل دير حزب سياسي”.