كود سيدي رحال//
أعلن رئيس مجلس جماعة سيدي رحال الشاطئ أن المجلس غادي يعقد دورة استثنائية يوم الخميس 4 شتنبر 2025 ابتداء من العاشرة صباحا، فالمركز الجماعي متعدد الاختصاصات. هاد الدورة مخصصة بالأساس لمناقشة واحد من أهم الملفات اللي شغلت بال الساكنة وزوار المدينة فالفترة الأخيرة: ملف تدبير قطاع النظافة.
المجلس غادي يطرح للنقاش والمصادقة فسخ العقد مع شركة “أوزون” للبيئة والخدمات، اللي كتشرف دابا على تدبير القطاع. القرار جا بسبب ما وصفو المجلس بـ”الإخلال الجسيم” للشركة بالتزاماتها، الشي اللي خلق أضرار كبيرة فصورة المدينة ونظافتها وبيئتها، وزاد من معاناة الساكنة.
النقطة الثانية فجدول الأعمال كتخص تعديل الميزانية السنوية للجماعة باش يتم الإعلان على صفقة جديدة للتدبير المفوض لفائدة شركة أخرى، اللي غادي تخضع للشروط القانونية المعمول بها.
القرار ما جاش من فراغ، حيث عاشت سيدي رحال الشاطئ طيلة فصل الصيف على وقع مشاكل كبيرة مرتبطة بتراكم الأزبال وانتشار الروائح الكريهة، خصوصا مع الإقبال الكبير ديال المصطافين على الشاطئ. وحسب مصادر غير رسمية، فالمعدل اليومي ديال النفايات خلال عطلة الصيف كيوصل لأطنان يوميا، بينما الوسائل ديال الجمع والتدبير بقات محدودة وما سايرتش هاد الحجم الكبير.
الساكنة بدورها عبرات غير ما مرة على غضبها. وحدة من النساء المقيمات فالمدينة قالت: “ولّينا مضطرين نسدو نوافذ الديور بسبب الروائح الكريهة والناموس، هاد الوضع ما بقيناش قادرين نتحملوه”، بينما واحد الشاب من تجار المحلات التجارية أكد أن تراكم الأزبال “أثر بزاف على السياحة وحتى على حركة البيع والشراء”.
دابا، الأنظار كولها متجهة نحو الدورة الاستثنائية المقبلة، واللي كيتعلق عليها أمل كبير باش تلقى سيدي رحال الحل الجذري لمشكل النظافة اللي ولى كيعكر صفو الحياة اليومية ديال الساكنة وكيشوه جمالية واحدة من أهم الوجهات الساحلية فالجهة.