سهام البارودي – كود////
كايضحكوني اللحايا فاش شي واحد فيهم كايديرها گد راسو كيفاش كاينوضو يضّامنو معاه زعما، حيت اللحايا ديالنا راس مالهم غي لسانهم ( الحمد للمخزن لي قاطعها فيهم) كاينوضو زعما كاملين يدافعو عليه و يبارطاجيو عليه المنشورات فحال دوك الحيّاحة ديال الحلّوف و لن نسلّمكم اخانا و نحن نشهد للأخ فلان بأنه انسان كدا و كدا و شي تصاور و شي منشورات ! انا فاش شفت داكشي فالأول كايصحابني ولد البسطاوي مات الله يرحمو ! صدّق السيد غا قوّدها حيت بارطاجا واحد الفيديو ديال شي الارهابي شبعان تكفير و افكار ظلامية و داكشي ديال الديموقراطية شركية و كفرية و الجهاد و السلطان الجائر و دوك المصطلحات ديال داعش.
فحالا نضت دابا انا بارطاجيت شي فيديو ديال شي بيدوفيل كايتلذذ فيه بأجساد الدراري الصغار واش ماغاديش نتسمى كانروّج لأفكار شاذّة ؟
راه هاكا كاتبدى، راه هذا هوا المناخ لي كان قبل أحداث سطاش ماي الارهابية، بنادم كايبدا يروج لأفكار متطرفة وسط الناس حتى كاينوض شي أحمق و لا شي مجموعة ديال الحمّاق يتيق بيه و يشتت زكو وسط شي بار و لا شي مقبرة !
اللحايا كايصحابهم الحيحة ديالهم زعما غاتخلع المخزن و لا غايكسبو بيها التعاطف ديال العامّة:
أولا بالنسبة للمخزن، و الله يا مّيمتك و درتيها گد راسك لازگلك، داروها قبل منّك بزّاف و مانفعهم لا تحياح لا منشورات فايسبوكية، المخزن ديالنا ماعندوش مع الأفكار المتطرّفة الظلامية، لي غلط يودّي و لي كرّط يفرّط و الحمد لله لي البلاد ماشي سايبة.
ثانيا بالنسبة للعامّة، المغاربة بشكل عامّ، اللهم لك الحمد ماعندهمش مع دوك صحاب قال و قال، المغربي باغي يصلي نهار الجمعة و يضرب شي گصعة ديال كسكسو و السبت تلقاه فمولاي عبد الله مخشي مع الشيخات فشي خزانة و كايتفرج فالتبوريدة و فالليل فالصف الاول ديال مهرجان الشواطئ فالجديدة كايشطح على يا ختي غير گاري گاري ديال الداودية، تَا شكون تسوق ليك نتا و للأفكار السودوية ؟ المغاربة شعب محب للحياة و الفن و الموسيقى و الرقص و الفلوس و الماكلة و العيوط و گناوة … البعابع لا ضّامنو معاك ! ثم أصلا أصلا لا كلمة تعلو فوق كلمة القانون و المخزن فوق الجميع.