محمد الشمسي -محامي بهيئة البيضاء////
بزاف ديال الناس كيخلطو بين قرينة البراءة والحق في الخبر، ولكثير من الناس مكيفرقوش بين نشر خبر اعتقال فلان، وبين المس بقرينة البراءة ديال هداك فلان…
اعتقال فلان هو خبر، خاصو يكون خبر صحيح ووقع فعلا، في هاد الحالة يصبح نشره عملا صحفيا مشروعا وواجبا وهو من صميم عمل الصحافة، لا تتقيد فيه الصحافة إلا بشروط مهنية وتقنية في نشره، كأن تأتي عملية نشر الخبر مستوفية لجميع الشروط المهنية مثل توفر النشر على الجواب على اسئلة من قبيل (ماذا ومتى وأين وكيف ولماذا) وهي اللي كيسميوها في علم الصحافة ب (5W) أو (فايف ضابليو)…وسماوها هكاك حيت ديك الاسئلة باللغة الانجليزية كلها كتبدا ب W…
نشر خبر الاعتقال متى كان صحيحا هو واجب مهني، وعدم نشره هو إخلال بهذا الواجب وإنكار لرسالة الصحافة، ولكن كاين شي أخبار واخا توقع وتكون صحيحة متنشرهاش شي صحف، في حين تنشرها صحف أخرى وهذا مرتابط بالخط التحريري للصحيفة أولا، وبنوعية الخبر اللي يقدر يكون يهم شي واحد أو جماعة أو شركة عندها علاقة بالصحيفة نفسها، كأن يهم الخبر فضيحة مسؤول حزبي في جريدة حزبية أو يهم شركة لها عقد استشهاري مع الجريدة، وممكن نفس الخبر تناولو وتنشرو كل جريدة بطريقتها الخاصة، وهاد الشي عادي وطبيعي…
أما قرينة البراءة فهي مبدأ دستوري وقانوني وكوني كتنص على ان المتهم بريء حتى تثبت ادانته بحكم حائز لقوة الشيء المقضي به وصدر في محاكمة عادلة، هاذ المبدأ معندو علاقة بنشر خبر اعتقال المتهم اول مرة وتغطية فصول تقديمه امام النيابة العامة او أمام قاضي التحقيق او أمام قضاء الحكم، اللي مطلوب هنا هو احترام السرية اللي كينص عليها القانون وعدم إصدار أحكام في حق المتهم، والقضاء واضع يدو على الملف، وهذا كيبان من خلال العبارات المستعملة في التغطية الصحفية، اللي ماخاصهاش تنحرف على مبدأ الإخبار والحياد والموضوعية والكل بمهنية.
الناس باغين الصحافي يبقا يعزل في الأخبار اللي ينشر واللي مينشرش، وباغين الصحفي يبدا يعبر في الأخبار هادي حشومة هادي عيب، هادي مخاصهاش تنشر، هادي فيها تشهير ، هادي فيها مس بالبراءة، هاد الشي كامل كيقول بيه اللي مكيفهمش في الصحافة، وهو في افضل الاحوال ديالو قارئ صحافة وليس دارس صحافة ولا متخرج من معهد الصحافة، لأنه خلال مدة دراسة الصحافة في المعهد ديال الصحافة أو في كليات اللي فيها شعب خاصة بالصحافة فالدروس اللي كيتلقا الطالب الصحفي مافيها حتى حاجة من هاد الشي اللي كيطلبو الناس من الصحفي، أي أنه يدير ميزان ويبدا يعبر لخبار، هادي تنشر هادي متنشرش، وعلاش؟ باش منشوهوش الناس، الصحافة مكتشوه حد، الصحافة كتنشر خبر خاصو فقط يكون صحيح، وتعرضو للجمهور بطريقة احترافية، مافيهاش تحامل او تشفي او انتقام او دفاع…
الصحافة مرتابطة بالأحداث بالوقائع وكتصنع منها أخبار، الصحافة مرتابطة بالفضائح وكتقلب عليها باش تنشرها، الصحافة خاصها عاما تختالقش الأخبار ومتنشرش الاخبار الزائفة ومتزيدش أو تنقص من الخبر…
علامن كتبقا اللومة؟ شكون دار الشوهة؟ اللومة والشوهة تبقا عند الشخص او الجماعة او الجهة اللي تورطت في الخبر، هي اللي كتحمل المسؤولية لأنها هي التي صنعت الحدث أما الصحافة فراها عا نشراتو، فمادام الخبر صحيح وحقيقي فالصحافة ميمكنش ليها تدير عين ميكا على خبر صحيح، وإلى صحيفة دارت عين ميكا على خبر لاعتبارات سبق شرحها فصحيفة اخرى غادا تنشرو وهداك حقها…وهاد الشي كذلك عادي في عالم وفي علم الصحافة…
الحياة الخاصة او الصور الخاصة هي اللي كيمارسها صاحبها أو يلتقطها في مكان خاص بعيد على الأعين، هادي معندش الصحافة كيفاش تنشرها ولا يحق لها نشرها ولو وضعت يدها عليها، ورغم ذلك هناك (صحافة الفضائح) وهي نوع من الصحافة معروفة في العالم كتنشط بالخصوص في انجلترا وهي عندها معدات متطورة للتجسس على المشاهير والنجوم سواء بطائرات بدون طيار أو بواسطة منظار متطور وهاد النوع من الصحافة كيكون معول على القضايا أمام المحاكم ومستاعد لتنفيذ الاحكام الصادرة ضده وتعويض الضحايا…
نرجعو لقضية الممثلة او المؤثرة اللي تنشر خبر اعتقالها عبر الصحافة، واللي مبغاوش الناس الصحافة تنشرو، ولو ان الناس كيقراو يوميا اخبار ديال ناس آخرين معتقلين وكتنشر الاخبار عليهم ولم يحركو ساكنا حتى جا خبر المؤثرة او الممثلة، وهنا علامات استفهام كبيرة ؟؟؟ المهم راه تبين على ان الاعتقال هو صحيح، وتبين أن سبب القضية مرتبط بشبهة جنحة معينة، (خيانة زوجية أو فساد، معنديش معطيات على الملف) فالصحافة في هاد الحالة دارت خدمتها، ونشرت خبر صحيح، اللي كيتحمل تبعات النشر هو المشتبه فيهم اللي سمحو لنفوسهم يطيحو في هاد المشكيل، ماشي الصحافة اللي في نهاية المطاف دارت خدمتها.
الصحافة بحال النحلة مرة مرة كتقرص ولكن القرصة ديالها فيها شفاء، لكثير من المسؤولين كيخافو من الصحافة اكثر من القانون ومكيزعموش على اقتراف شي جريمة…
خليو عليكم الصحافة تنشر الاخبار الصحيحة وبشكل مهني، اللي بغا يبدل خاصو يبدل المناهج ديال علم الصحافة في العالم كامل اللي كتقول ان ما يلتزم به الصحفي هو صحة الخبر فقط، وطريقة تقديمه…
وسيرو شوفو مع دوك اللي سمحو لروسهم يكونو مادة صحفية بتهور وبطيش ورعونة منهم..