گود سبور//
طلّع الناخب الوطني، وليد الرگراگي الريتم داخل معسكر المنتخب الوطني المغربي، استعدادا لمواجهة كل من النيجر وزامبيا ضمن اقصائيات كاس العالم 2026.
وبعدما وصلو لاعبين المنتخب المغربي ودارو حصة تدريبية بالبارح الاثنين فالعشية، قرر وليد الرگراگي برمجة 2 حصص تدريبية اليوم الثلاثاء، وحدة فالصباح والثانية فالعشية، باش يرفع من الجاهزية البدنية ديال اللاعبين وريتم الاستعداد للماتش الاول اللي غايكون ضد النيجر السبت الجاي.
الاجواء داخل المنتخب المغربي زوينة وايجابية واللاعبين ناشطين ومركزين باش يحسمو التأهل لكاس العالم 2026، فالماتش الجاي ضد النيجر فتيران مولاي عبد الله، ويبقى ماتش زامبيا فرصة يعطيها الرگراگي للاعبين الاحتياطيين باش يبينو القدرات ديالهم، مع العلم انه مازال كايقلب على حل لمشكل الدفاع اللي فيه الخيارات قليلة بزاف، والمدافع اشرف داري غايب على التداريب ديال المنتخب بعدما توعت مع الاهلي المصري الويكاند اللي فات.