كود كازا///
فاجتماع لجنة التعمير والممتلكات بمجلس مدينة الدارالبيضاء، خرج رئيس اللجنة اللي قرا داكشي اللي خرج بيه الاجتماع ديال اللجنة، ومعاه رئيس جماعة المعاريف عبد الصادق مرشد، الذي يوصف بالرئيس “الهضور” الذي يقول الشيء وشده منذ كان في حزب المعطي بوعبيد، (خرجو) كيركبو على المقال اللي نشراتو جريدة لوموند الفرنسية، وبداو كيدينو وكيتكلمو بحال إلا هما الناطقين الرسميين باسم الدولة.
ولكن فالحقيقة، هاد الموضوع ماشي من اختصاصهم، حيث المهام ديالهم واضحة فالقانون، وهي النظر فالوضع اللي كاتعيشه العاصمة الاقتصادية، والتشخيص ديال المشاكل اليومية ديال الساكنة، بحال أزمة النقل، التلوث، تدبير الملك العمومي، والخصاص الكبير فالبنيات التحتية والخدمات.
المواطنين كيتسناو منهم حلول عملية ومشاريع ملموسة كتحسّن عيش الناس، ماشي خطابات سياسية وخرجات إعلامية اللي الهدف منها غير البوز وركوب الموجة.
الدارالبيضاء اليوم كاتعاني من اختناق مروري خانق، نفايات مرمية فالأزقة، أحياء ناقصة تجهيزات، وضعف فالمرافق العمومية، وهي كلها ملفات كاتسنا نقاش جدي داخل هاد اللجان.. في وقت مازال المسؤولين ديال كازا كا يحتافلو بتدشين مراحيض يعني “كوابن” أعزكم الله،وامتى هادشي في العام 2025.
المطلوب من المنتخبين يركزو على هاد القضايا اللي قريبة من المواطن، ويخليو الدفاع على صورة المغرب للمؤسسات الوطنية المختصة، اللي عندها الإمكانيات والشرعية باش ترد على الحملات الإعلامية الأجنبية.
الساكنة باغا تشوف عمل، ماشي شعارات، و ماشي مزايدات.