وكالات//
دخلات المغنية العالمية تايلور سويفت، اللي ربحات جائزة “غرامي”، وخطيبها لاعب كرة القدم الأمريكية ترافيس كيلسي، فمفاوضات مع منصة “نتفليكس” باش يديرو فيلم وثائقي كيحكي على قصة الحب ديالهم.
الزوجين، اللي بجوج عندهم 35 عام، علنو على الخطوبة ديالهم السيمانة اللي فاتت، من خلال تصاور رومانسية، من بينها وحدة كيبان فيها كيلسي كيعرض الزواج على تايلور فحديقة عامرة بالورد.
وعلى حساب جريدة “ذا صن”، “نتفليكس” باغية دير ميزانية كبيرة باش تصوّر هاد الفيلم، وكتخطط تكون هي الوحيدة اللي عندها الحق توثق العرس ديالهم، حيث كيتعتابر حدث عالمي ومثير للاهتمام.
تايلور سويفت ماشي جديدة مع “نتفليكس”، حيث سبق ليها خدمت معاهم فالفيلم الوثائقي Miss Americana فـ2020، اللي حقق نجاح كبير، وفيلمها الموسيقي: Taylor Swift The Eras Tour دار أرقام قياسية وحقق أكثر من 261 مليون دولار، بالرغم من أنه تعرض فواحد المنصة اللي كتنافس “نتفليكس”.
من جهة أخرى، ترافيس كيلسي بدا حتى هو يدخل لعالم الترفيه، وشارك فالفيلم Happy Gilmore 2 مع آدم ساندلر على “نتفليكس”، وكيستعد يدير أعمال كوميدية مستوحاة من الحس ديالو فالنكتة والضحك.
كاين اللي كيشوف أن “نتفليكس” ممكن تتبع نفس الطريقة اللي دارت مع الأمير هاري وميغان ماركل، اللي وقعوا معاها عقد طويل باش يديرو محتوى وثائقي وترفيهي لقا صدى كبير.
وفنفس الوقت، كتوجد سويفت باش تخرج الألبوم الجديد ديالها بعنوان Showgirl Life فـ3 أكتوبر الجاي، بعد ما علنات عليه فواحد البودكاست اللي كيقدمو كيلسي، وهاد الإعلان دار رقم قياسي ديال 1.3 مليون مشاهد فـنفس الوقت على “يوتيوب”.