وكالات//
فشل الموسم الثاني من برنامج “مع الحب، ميغان” اللي كتقدمو دوقة ساسكس ميغان ماركل، فأنه يدخل لقائمة أحسن 10 برامج مشاهدة على نتفليكس، وهادشي كيبيّن تراجع واضح مقارنة مع الموسم الأول اللي كان عندو إقبال حسن ملي تدار فمارس اللي فات.
تْعرضو 8 حلقات جداد من البرنامج نهار 26 غشت، ولكن حتى دابا، بعدما دازو 6 أيام، ما قدرش يحقق نسبة مشاهدة كافية باش يدخل للقائمة الأسبوعية، خصوصاً مع وجود منافسة قوية من أعمال خرين بحال الموسم الثاني من مسلسل”وينزداي” والوثائقي “الخاسر الأكبر”.
وحسب التقديرات، عدد المشاهدات ديال الموسم الثاني كان ناقص بنص مليون مقارنة مع الموسم الأول، اللي جاب 2.6 مليون مشاهدة فالأسبوع الأول ديالو.
موقع “Parade” قال أن ضعف الإقبال على البرنامج ممكن يهدد الاستمرار ديالو، بحيث مصدر مقرّب صرّح أن العمل “ما كيحققش النتائج اللي كانت نتفليكس كتسناها”، وممكن ما يتجددش لموسم ثالث.
الصحف البريطانية زادت الطين بلة، بحيث كانت الانتقادات قاسية بزاف:
جريدة “التلغراف” عطات البرنامج جوج نجمات فقط، ووصلات توصف ميغان ماركل بـ”ماري أنطوانيت ديال مونتيسيتو”، وقالت أن البرنامج مملّ وكيضرب الأعصاب.
أما “الغارديان”، وصفت الموسم الثاني بأنه “فارغ وكيحاول يظهر فيه ستيل ديال الحياة بطريقة غبية ومصطنعة بزاف”.
ورغم أن ميغان حاولات تجيب شخصيات مشهورة وضياف بارزين باش تزيد تشد الانتباه، باين أن هادشي ما كانش كافي باش ينقذ البرنامج من الفشل عند الجمهور وحتى عند النقاد.