مونديال قطر والتناقضات لكبيرة. مراكز اعلامية كبيرة بزاف وناس كثار ولكن القطريين فيهم اقلية. صحافي برازيلي: “هاد الشي ديال راه عندي فلوس ولكن بلا روح”

كود الدوحة ///

مونديال قطر بدا واخا غدا اول ماتش فيه بين الدولة المنظمة قطر والاكوادور. بدا لان كلشي واجد. غير طبعا كاينة مفاجئات كثيرة. باش توصل لمطار حمد الدولي ما كتعطلش بزاف. الباسبور و”هيا” اللي مطلوبة. بعدها كتلقى الديوانة. هنا بحال ايلى حاضيين غير الشراب. مسافرة من كازا للدوحة جايبة معاها قرعة الشامبانيا قالو ليها ممنوع. سولاتهم كيفاش شريتها من مطار محمد الخامس بتذكرة جاية لقطر من دوتي فري وتمنعوني هنا. عيطات ديوانية قطرية محجبة لمسؤول اخر. شاف فيها بلا ما يهدر بلى والو قال ليها ما غادياش دخليها. ايلى كنتي راجعة لبلادك بعد 48 ساعة تلقايها فالمطار. بعد هاد الفترة غاديين نلوحوها. 

هاد المسؤول كان كيهدر ووراه كان يالله وصل اسطورة من اساطير الكورة الهولندية رود گوليت مع شي صاحبو. واش كانو غاديين يمنعوه حتى هو يدخل اش بغى يشرب؟ موحالش. 

 المسؤول القطري بقى يقول ممنوع ومشى فحالو. شوفو الادب كيف داير. ديك السيدة ديال الديوانة جبدات كلينيكس وهزات القرعة ورزات لمرا ف50 يورو. علاش هاداك لكلينيكس واخا هي مسدود عليها فبلاسيتكة؟ ما فهمات لا السيدة لا للي كانو وراها كيتسناو دورهم.

فالدوحة كلشي فايت لقياس. كلشي “اكس اكس ال” لكن ناقصاه الروح. مطار كبير ونقي وخدمات كثيرة لكن كيديروها غير الاجانب. باش تخرج من المطار تلقى عدد من شركات التلفونات كتعطي كارطات فابور بعد ما تاخد معطيات شخصية. مع هاد الشباب والشابات العربية ما دير ليك والو. كلشي كيهدر الانجليزية. ماشي قطريين او عرب. غالبيتهم تقريبا من باكستان وسريلانكاو وبنغلاديش. 

حتى الشباب اللي كيساعد الزوار باش تاخد الميترو او الطاكسي كلهم من جنسيات اسيوية وافريقية. هنا ما كايناش العربية. خاصك الزهر باش تلاقى مع شي سوري او مصري او غيرو من الجنسيات العربية. قلال بزاف.

اذن لغة قطر الرسمية هي الانكليزية. فالطاكسي. فالشارع. فالبيع والشرا. فسوق واقف. فلمشيرب حدا الريان. صعيب تلاقى مع قطريين كثار من غير اللي فالامن…

فالميترو ديالهم بخطوطو الثلاث كلشي كيبين باللي حنا ماشي فدولة متقدمة ولكن مرفعة بزاف. لكراسى. التصميم الداخلي. جيل جديد من الميترو. حتى هو القطريين قلال بزاف كيركبوه.

فخط جاي من المكتبة اللي حداها المركز الاعلامي واللي فيه الندوات الصحافية لمشيريب كان حداها صحافي برازيلي خدام فمجلة “گول” الرياضية المختصة. راجل مادي وجايب ماشي غير فالكورة بل حتي فالدنيا. قبل ما يبدا المونديال حاس باحباط “ايلى بغيت نشرب بيرا خاصي نمشي لوطيلات. اش هاد المونديال”. الصحافي زاد ل”كود” “ما كايناش الاصالة فهاد الشي. فلوس كثيرة مخسورة ولكن الروح ناقصة. الفيفا دارت خطأ غادي يحاسبها التاريخ باش عطات لهاد الدولة المرفحة كاس العالم”.

فروسيا شفنا جيل جديد كلو قل من عشرين عام تقريبا هو اللي كان واجهة مونديال 2018. كلهم رواسا. جابو شي اجانب غير من جانب الانفتاح وصافي. هنا فقطر كلشي اجانب اللي كيديرو هاد الخدمة. غالبيتهم خاصة فالشارع حدا الميترو من افريقيا.
واش انطلاق المونديال غادي يقدر ينسي ملايين الجماهير هاد الامور ولا مع مرور الايام ديك الدهشة ديال مراكز اعلامية كبيرة بزاف فيها سوبيريت ومصبنة ومطاعم…. غادية طير

إقرأ الخبر من مصدره