كود: كازا
قرر المكتب المديري لنادي الرجاء الرياضي يسحب ولوج الموظف سميتو “بوشعيب.خ” من منصة FIFA Connect، بعدما تفضح وهو كيسرب معلومات حساسة كتخص الفريق للصحافة وبعض الصفحات فمواقع التواصل الاجتماعي.
المعني بالأمر تسد حسابو نهائيا فالمنصة، وتوجهت إدارة الرجاء بمراسلة رسمية للعصبة من أجل تحييد ولوجو بشكل كامل.
وفنفس الوقت تدار حساب جديد وتسلم لموظف آخر باش يكمل المهام الإدارية بلا أي تأثير.
منصة FIFA Connect كاتعتبر وحدة من الأدوات الأساسية فالكرة العالمية، حيت كتسجل فيها عقود اللاعبين، وكيتدار عبرها تأهيلهم والمصادقة على جميع المعاملات المرتبطة بالجانب الإداري والرياضي.
الملف غادي يتعرض غدا قدام المجلس التأديبي، والقرار باقي معلق بين جوج خيارات: إما الاكتفاء بتوبيخ الموظف، أو الطرد النهائي مع احتمال متابعة قضائية فحقو.
هاد القضية خلات ردود فعل جماهير الرجاء تغلي فالصفحات، بين اللي كيطالب بعقوبة قاسية والطرد النهائي بحجة “الخيانة” و”ضرب استقرار النادي”، وبين اللي شاف أن تسريب بعض المعطيات ماشي سبب كافي باش يوصل الملف حتى للقضاء. وسط هاد الانقسام، كيبقى القرار الأخير بيد المكتب المديري والمجلس التأديبي.