محمد سقراط-كود///
هادي سنوات وموقع گود داير حملة ضد هرگاوة بجميع طبقاتهم الاجتماعية، وسواء كانوا مواطنين او رجال سلطة او أمن، حملة گود لاتعرف في الحق لومة لائم، ولكن للأسف الدولة لا تتماهى مع الحملة بالشكل الكافي وكيف ماهو مطلوب منها كمحتكرة للسلط، بل العكس كاين تساهل مبالغ فيه مع هرگاوة، راه فاش كنحطو صورة لهرگاوي محتل الملك العام او حاط طوموبيلتو فوق الطروطوار راه خاص داك الساعة الديباناج يوقف عليه او الصقور يبعثو معاه ويطبقوا القانون، ويكونوا في خدمة البلاد والعباد، ولكن للأسف لي كنشوفوا هو العكس واه أغلب الصور كتكون في قلب المدن ماشي حتى شي مناطق نائية او شعبية يعني قبالت السلطة، وكاين فصول وقوانين كتنظم وكتعاقب على دوك السلوكات ومع ذلك تطبيقها مكاينش للأسف، وهذا من أهم عوامل تشجيع هرگاوة في البلاد.
كيف شفنا في الماتش ضد النيجر عند كل تمريرة كيفكرنا المعلق بلي هذا أحسن ملعب في العالم وصافي ضمنا تنظيم مقابلة الافتتاح والنهاية، ولكن غير كمل الماتش العالم شاف مغاربة هبطو للتيران وطالقين لايڤات وكيتجاراو، وبان أن التيران آه واعر ولكن التنظيم وبعض المتفرجين خارية عليهم، وبحكم أن التيران كلو كاميرات وهادوك الناس لي نزلو لأرض الملعب كاين فيديوات ديالهم، وهادشي راه كاين فصول في القانون كتعاقب عليه، إذن علاش الدولة ماباغاش تربي شعبها وتحارب هرگاوة، المفروض أي واحد نزل لأرض الملعب يكون مشدود دابا ونهار التنين يتقدم عند وكيل الملك، ولكن هادشي ماوقعش، إذن كاين تساهل واضح وصريح من طرف الدولة مع هرگاوة .
راه حتى المتفرجين في أوروبا كانوا كينزلوا لأرض الملعب ويربجوها، والجمهور يتقاتل وفايتين مطيحين مدرجات ديال ملعب كامل، وعرفوا موجات ديال العنف وسيطرة الهوليكانز على المدرجات، فين يبانوا شي سوء التغذية ديالنا، بنادم فيه جوج ميترو وشبعان بيرة وبايكون، ومع ذلك بالقانون وسلطة الدولة تحاربوا گاع هاد الظواهر، بالغرامات وبالعقوبات الحبسية وبالمنع من دخول الملعب مدى الحياة وعقوبات أخرى، خلات الملاعب بلاصة آمنة حاليا وخالية من هرگاوة، هادشي حاليا يمكن يتدار حتى في المغرب كاين التجهيزات والإمكانيات وآليات الضبط وحتى النصوص القانونية، للأسف لي مكاينش هو إرادة الدولة.