سهام البارودي- كود//
المغرب بلد فقير من ناحية الموارد الطبيعية، ماشي محفحف گاع و لكن راه عاوتاني حنا ماشي هوما قطر لي شايطة عليهم فلوس البيترول و الغاز تاولاو كايديرو التيرانات كليماتيزي و حنا ماشي الامارات و ماشي السعودية و ماشي حتى الكونغو-كينشاسا لي الارض ديالهم شبعانة ذهب و نحاس و معادن و لا النيجر لي شبعان يورانيوم… حنا دولة فقيرة عندنا الفوسفاط و جوج بحورا و من بعد ؟! شحال كايسوى گاع هاد الفوسفاط ؟!
داكشي علاش المغرب لاخطاوه الموارد البشرية ديالو راه غايضربو الخلا ! لا غدا الناس لي خدامين فالسونطر دابيلات و المعامل فالمنطقة الحرة د طنجة و سيدي يحيىى و كازا هزو يديهم و حبسو الخدمة غايضربنا كاملين الخلا حيت جزء مهم من موارد الدولة المغربية هوما الضرائب لي كايخلصو هاد الناس ( لا حيدنا المعاونة لي كاتسيفط الجالية ) ! الضريبة على الدخل و الضريبة على الشركات هي باش الدولة اليوم كاتقاد الطرقان و تبني السبيطارات و المدارس و تخلص البوليس و الفراملية و الاساتذة و الاطباء لي كايعالجونا. المصيبة الكبيرة انه لي قاريين و عارفين هادشي ماباغينش يساهمو بالضريبة ! كلشي باغي السيبة ! و هادشي لي بان مؤخرا فاش حاولات الحكومة تفرض الضريبة على مجموعة من المهن لي ماليهم كايضربو الزبابل د الفلوس فجيبهم ! كلشي ناض كايبكي و يتخنن و يدير الضرابات باش مايخلصش الضريبة ! تاواحد ماباغي يسمح فشوية من الفلوس ديالو للدولة باش تقاد بيهم البلاد !
زيد هادشي على التسلت الضريبي لي كايديرو الشركات الكبيرة ! شنو غايبقا ؟ غايبقاو غير الموظفين د القطاع العام و اجراء القطاع الخاص ! الحيط القصير لي كاتقطع ليهم الضريبة من لاسورس و ماعندهم مايقولو ! هادو لي كاتعرف الدولة تحگر عليهم و فين ماكاين شي زيادة تفرعهم بيها و فين ماكاين شي ضريبة تضامنية تلصقها ليهم هوما الاولين ! واش ماشي الحگرة هادي ؟ واش حيت الموظف الدولة عارفة الصالير ديالو بالفاصلة و عارفة كيفاش توصل ليه و لاخرين صحاب الاعمال الحرة ماعندها لا كيفاش تكونطرولي مداخيلهم لا كيفاش توصل ليها و نهار كاتنوي توصل ليها كاينوضو يديرو ليها العصا فالرويضة و يوقفو قطاعات حساسة!
هادي راها مشكلة واشمن مشكلة ! القطاع الغير المهيكل ماباغيش يخلص الضريبة ! اليوتوبوزات ماباغينش يخلصو الضريبة ! التيكطوكوزات مابغينش الضريبة و حتى العدول و المحامي ماباغيش يخلص الضريبة ؟ ايوا ؟ شكون غايخلص الضريبة و شكون غايعاون الدولة باش تبني و تقاد و تصايب ؟
مايمكنش نحگرو غا على الموظف ! يا نخلصو كاملين ! يا تاواحد مايخلص و ديك الساعة غانوليو فحال دول افريقيا جنوب الصحراء ! كاتلقا بنادم ساكن فقصر و مستف فيه عشرة د الطوموبيلات و فاش كايخرج من القصر عند الباب كايبدا التراب و الغبرة و مجاري الواد الحار فيهم الخرا كايتسارى هاكاك عاين باين قدام الرونج ! علاش ؟ حيت ماكايناش الضريبة و فاش ماكاتكونش الضريبة ماكايكونوش الفلوس و فاش ماكايكونوش الفلوس كاتريب الدولة.
Laisser un commentaire