كود الرباط//
ف أول خرجة اعلامية له تزامنا مع الدخول السياسي، اختار رئيس الحكومة عزيز أخنوش، يخرج ف برنامج خاص يبث بشكل مشترك على القناتين الأولى والثانية، مساء يومه الأربعاء 10 شتنبر، ابتداء من الساعة العاشرة ليلا، والموضوع هو حصيلة أربع سنوات من عمل الحكومة.
اخنوش، غايناقش كذلك الدخول السياسي والاستعدادات ليه، إضافة إلى تصوره حول أزمة التشغيل والحلول للي موجدة الحكومة فهاد العام للي بقا ليها.
الحلفاء ديال اخنوش فالحكومة، كيتسناو هاد الخرجة، وشنو المساجات لي غايصيفط، واهم القرارات للي ممكن يعلن عليها.
أهم موضوع دبا هو التشغيل، كان فيه خلاف كبير وسط الحكومة، خصوصا وأن حزب الاصالة والمعاصرة عندو ملاحظات حول خطة التشغيل وتحفظ على طريقة تدبير من طرف وزير الشغل يونس السكوري، للي اصلا داخل فحروب مع كاتب الدولة فنفس القطاع، هشام الصابري، المحسوب على تيار المنصوري.
خرجة مهمة فسياق سياسي “بارد” وف ظل تراجع منسوب النقاش العمومي حول القوانين الانتخابية وف ظل عودة الاحتجاجات للهوامش خصوصا بإقليم ازيلال. زيد عليها “اللا انسجام” وسط الحكومة، خصوصا ف ظل مناورات نزار بركة، الامين العام لحزب الاستقلال، للي دار تجييش وسط البرلمانيين ديالو والمقربين منو وبعض المكلفين بالاعلام الرقمي باش يهاجمو رئيس الحكومة.