گود سبور//

رد الناخب الوطني وليد الركراكي على المنتقدين له من الجماهير المغربية، اللي اعتابرو أنه قلل من جمهور مدينة وجدة في التصريحات ديالو من ورا ماتش المنتخب المغربي ضد النيجر اللي تلعب فالرباط ضمن إقصائيات كاس العالم 2026، وأنه فضل جمهور الرباط عليهم.

وليد الركراكي وبعد ماتش المغرب ضد زامبيا اللي تلعب اليوم الاثنين بزامبيا، خرج ورد على المنتقدين له، ونفى أنه كان ناوي ينقّص من جمهور مدينة وجدة، وقال في تصريح لقناة الرياضية: “وا هضرو معايا فالكورة.. أنا الأول كنت باغي نلعب فوجدة وقدام جمهورها”.

https://www.facebook.com/share/v/1HtBTnqpiK/?mibextid=wwXIfr

وزاد وضح الرگراگي وقال: “اللي قلت هو دوماج كنا باغيين نفرحو فوجدة وما فرحناش ولكن كتاب لينا نتأهلو من الماتش الأول فتيران مولاي عبد الله”.

وكان المنتخب الوطني المغربي لعب شهر مارس الماضي بمدينة وجدة ضد كل من تنزانيا والنيجر، ضمن إقصائيات كاس العالم 2026، وكان قريب يحسم التأهل للمونديال قبل ما ينجح فهادشي فالماتش اللي فات ضد النيجر فتيران مولاي عبد الله.

هاد الطريقة ديال رد وليد الركراكي على الجمهور ماشي رزينة وتقدر تزيد تخلي الجماهير اللي مازال متعاطفة معاه تنفر منو، حيث خاصو يكالمي اللعب مع الجمهور راه سلاح مهم لدعم المنتخب الوطني خصوصا وأن كاس افريقيا قريبة ومحتاجين للاتحاد ماشي للتفرقة، وما فيها باس يخرج يعتذر ويطلب المسامحة.

إقرأ الخبر من مصدره