وكالات//
البوليس التركي كيقلب على درّي مراهق سرق سلاح وقرطاس من مركز ديال الرماية، وحاول ياخد طوموبيل بالقوة، بطريقة كتفكر فـ لعبة “بابجي” اللي مشهورة فالتليفونات.
حسب وسائل الإعلام التركية، نهار الخميس، الولد أجنبي وعندو 16 عام، ومازال هارب من البارح، والسلاح باقي معاه.
البداية كانت فـ مدينة “كهرمان مرعش” فجنوب تركيا، فين سرق جوج ديال الفرادا (مسدسات) وشي 300 طلقة من مركز ديال الرماية، وهرب من تم بلا ما يشدوه، ومشى فحالُو بحال اللي داير مهمة جديدة.
16 yaşındaki çocuk poligondan tabanca ve mermi çaldı
Maraş’da poligondan iki adet tabanca ve 300 adet mermi çalan 16 yaşındaki çocuğun yakalanması için geniş çaplı çalışma başlatıldı.https://t.co/xQHPOum2LE pic.twitter.com/V9SsFzapTW
— Nupel Haber (@nupelonline) September 11, 2025
من بعد، مشى لمعرض ديال الطوموبيلات فـ نفس المدينة، وبغا يسرق شي طوموبيل، ولكن ما قدرش، وخلا بلاصتو فيها خراب. من بعد، حسب الكاميرات اللي شافوها البوليس، بان باللي مشى لوحد الجبل، وباقي البوليس تابعينو.
كاينين فيديوهات وتصاور من المدينة، اللي كيبانو فيها البوليس كيدورو فالزنقة وكيقلبو عليه، باش يمنعوه يدير شي جريمة خايبة.
وهاد الشي وقع غير يومين من مور ما درّي آخر، فعمره حتى هو 16 عام، هجم على مركز ديال البوليس فالجهة الغربية ديال تركيا، وقتل جوج ديال البوليس وجرح الثالث، حتى شدّوه البوليس من بعد ما طلقو عليه العيارات النارية وجرحوه.