گود سبور//
بدات معاناة جمهور الدار البيضاء بكري مع شراء تذاكر ماتشات الأندية ديالها، حيث البطولة الاحترافية غادي تبدا اليوم الجمعة.
وهاذ المرة مع جمهور الوداد الرياضي، حيث هو اللي غا يستقبل الماتش الأول هذا الموسم فتيران مركب محمد الخامس بالدار البيضاء، واللي غايكون ضد الكوكب المراكشي اليوم الجمعة.
وبعدما قدرت الجماهير الودادية تشري التذاكر ديالها من خلال الموقع الإلكتروني المخصص لهذا الغرض، بعدما كان فيه مشكل لساعات يوم الاربعاء الماضي وتحل هذا البروبليم من بعدها، دازت الجماهير للمرحلة الثانية، وهي اللي فيها التسخسيخ مرحلة “الصف” باش تيري التيكي ديالها اللي غادي تدخل به الماتش.
الشركة المكلفة ببيع التذاكر ديال الوداد وتوزيعها، خصصت 3 نقاط بالدار البيضاء للجمهور لسحب التذاكر ديالهم، وهي تيران بنجلون وتيران البيرجيگو وتيران روش نوار، ومن البارح الخميس وهذه النقاط عامرين وفيهم الزحام والصف فيهم طويل واللي باغي يتيري الورقة ديالو كايعرف راسو راه عندو موعد مع العذاب وسط الشمش فالزنقة والوقوف لوقت طويل.
وبالرجوع لسحب التيكيات، راه هذه الطريقة اللي كايتم بها هذا السحب مازال طريقة تقليدية بزاف، وحنا فعام 2025 مازال خاص المشجع اللي شاري التذكرة ديالو يمشي للسيبير باش يأبريمي الروسي بأنه شاري التذاكر ويمشي لنقاط سحبها ويشد الصف الطويل لوقت طويل للحصول على التذكرة.
هذا الشي راه كايحط علامات استفهام كبيرة على إمتى هاد الشركة غادي تواكب التنظيم ديال الماتشات، وتلقى حلول متطورة وسريعة تخلي الجمهور والمشجع يحس براسو راه غادي للتيران باش يشجع الفريق ديالو، ماشي غادي لمعركة والصف باش يتيري التذكرة، ومن بعدها يمشي للتيران يشد الصف باش يدخل، وعلاش ما يكونش الولوج للملعب بالتذاكر الإلكترونية، واللي شرا التذكرة ديالو من الموقع المخصص لبيع التذاكر يتيليشارجيها ويمشي يفاليديها فباب التيران ويدخل بها نيشان للملعب؟ راه المغرب مقبل على تنظيم كاس إفريقيا فديسمبر الجاي وكاس العالم 2030 بشكل مشترك مع اسبانيا والبرتغال اللي هربانين بزاف في طرق بيع تذاكر الماتشات والولوج إلى الملاعب، وغير للمعلومة راه المغرب فايت نظم مباريات وماتشات كانت فيها التذاكر الإلكترونية وعطات النجاعة ديالها.
