گود سبور//
تكرفصو العائلات اللي سجلو ولادهم فأكاديمية محمد السادس فسلا الجديدة وحسو بالحكرة، وكان استقبال خايب للأطفال من الأكاديمية اللي عندها امكانيات كبيرة ولكن سمعتها راه كاتشوه.
العائلات اللي مشاو يسجلو ولادهم فأكاديمية محمد السادس لكرة القدم، لقاو فيها نقص كبير فالأطراف الإدارية وفالتواصل معهم، والناس ملقاوش معامن يهضرو.
وهذا الشي بالإضافة إلى الحصص اللي ما بداوش فالوقت ديالهم، أما الاستعدادات لهاد اليوم الاول واللي عادة كايكون استثنائي راه ما كايناش.
وحسب ما توصل به جورنال “گود” من معلومات، كفاينة مستخدمة واحدة، ومعصبة وما قادراش تجاوب أسئلة الناس اللي جاو يسجلو ولادهم، وتجري الأمور وتسلمهم التونيات والأمتعة الرياضية، وفبلاصة ما تقلب على اللي يعاونها، خلات واحد السيكيريتي يغوت على الناس ويقولهم بإستفزاز “سالينا حتى للجوج”.
أكاديمية محمد السادس لكرة القدم، اللي موفرة لها امكانيات كبيرة، كاتستاهل طاقم إداري وفالتواصل احسن من هذا واطر ادارية تليق بالسمعة ديال الكورة المغربية والمغرب، خصوصا وأن الأكاديمية تحمل اسم غالي على گاع المغاربة، هو اسم سيدنا.