عثمان الشرقي – كود////
التبوريدة ماشي غير رياضة تقليدية، ولكن هي الرياضة لولا فالمغرب حيث كتشد أكبر حضور جماهيري فالمناسبات والمهرجانات. هاد الرياضة كتجمع بين الفروسية والفنون القتالية التقليدية، وكتطلب قوة، توازن، وسرعة من الخيول والفرسان، إضافة للتركيز والانضباط فالتحكم بالخيول وتنظيم الصفوف.
كاين فيها تاني المنافسة والتدريب على مهارات الفروسية والتحكم فالخيول. الفرسان خاصهم يتيمزو بلياقة بدنية عالية وقدرة على التنسيق مع الخيل، باش يقدموا عروض جماعية منظمة ومثيرة للجمهور ويكون تركيز باش يقدرو يوحدو الطلقة
اللي كيخلي التبوريدة مميزة هو أنها كتشد الجمهور بطريقة فنية رائعة، لكن للأسف موخداش حقها قالقنوات الإعلامية الوطنية،عكس العروض المملة ديال الخيل اللي كيبانو غير كينقزوا فليباريير. الجمهور المغربي، اللي غالباً مركز غير على الكرة، يقدر يولي متابع شغوف إلا تدارت نوادي للتبوريدة فكل جهة، ، وندعموا الشباب و الجمعيات الرياضية باش يتعلموا هاد التراث ويشاركوا فالمهرجانات وعلاش لا متدرجش فالاولمبياد
التبوريدة اليوم ماشي غير رياضة، ولكن رمز ثقافي كيعكس أصالة المغرب وعراقة تقاليده، وكتجمع بين القوة، التركيز، والفن اللي كيحبوه الجمهور. جا الوقت باش نعطيو الخيل ديالنا ومنتوجنا الثقافي حقو فالشهرة والمتابعة، ونديرو الإشعاع اللي كاتستاهلو التبوريدة على المستوى الوطني وحتى الدولي