گود سبور//
كشفت جريدة ليكيب الفرنسية، أن الدولي المغربي أشرف حكيمي من اللاعبين اللي مهددين بالإصابة داخل الفريق الفرنسي، حيث اكثرهم مشارك فاللعب وما رتاحوش من الموسم الماضي، وانهم خاصهم يردو معاه البال خصوصا بعد إصابة الفرنسيين عثمان ديمبيلي وديزيري دوي.
وحسب الجريدة الفرنسية، فأشرف حكيمي راد البال لهذا الشي باش يتجنب الإصابات، وداير بروگرام ديال التداريب فيه حصص تدريبية اللي كاترينيهم مع باريس سان جرمان وحصص تدريبية مع مدرب خاص شخصي ديالو كايتريني به.
أشرف حكيمي تضيف “ليكيب” عارف راسو تابعو كاس أفريقيا وماتشات كثار هذا الموسم، ومتبع برنامج تدريبي منظم يجمع بين حصص تدريبية فردية مع المدرب البدني ديالو، والهدف من هذا البروگرام ماشي غير تحسين السرعة والقوة والحركة، ولكن الهدف ديالو ايضا الوقاية من الإصابات وأن الجسم ديالو يرجع القوة ديالو دغيا، وراه داير مع هذا الشي نظام غذائي متوازن وكاينعس مزيان.
“ليكيب” قالو إن أشرف حكيمي وبعد الجهد البدني اللي دار والإصابة اللي جاتو مؤخرا خلال التوقف الدولي الماضي، وحيث خاصو يلعب كاس إفريقيا المقبلة، عارف بلي خاصو يتكايس على راسو ويسمع الجسم والعقل ديالو.
ومن جهة اخرى كشفت الجريدة الفرنسية، أن علاقة أشرف حكيمي مع باريس سان جرمان، ما بقاتش كيفما هي مؤخرا، بسبب الخرجة الإعلامية ديالو على Canal plus اللي كان هضر فيها على أنه يستاهل الكورة الذهبية، وأن النادي الفرنسي اتصل بالقناة المذكورة باش يبداو شي حاجة فالحوار عندها علاقة مع ما قال هو على البالون دور، واخا PSG كاينكرو هذا الشي.