كود سبور//
عبر البطل العالمي والاولمبي سفيان البقالي على الأسف ديالو حيث خسر لقب بطولة العالم لألعاب القوى ملي دخل فالمركز الثاني بسباق 3000 متر موانع، بالشمتة في آخر حاجز ودخل هو الثاني ورا النيوزيلاندي بيمش، وقال انه تعكل داكشي علاش خسر واكتفى بالتتويج بالفضية.
وبعد نهاية السباق، هضر سفيان البقالي وهو الدموع فعينيه وقال في تصريح له: “صعيب عليا نهضر اليوم، خصوصا وأنني كنت كانطمح ناخد الميدالية الذهبية الثالثة على التوالي ولكن ما قدرتش، وكانهدي هاد الميدالية الغالية لسيدنا الملك محمد السادس، وكانقوليه شكرا على الدعم ديالك، وكانهديها للشعب المغربي وكانقولهم شكرا للدعم ديالكم، وكانشكر والديا وتحيا للام والأب ديالي”.
ووضح سفيان البقالي، وقال: “صعيب عليا نتقبل هاد الخسارة ولكن كانشوف بلي عطيت كل ما عندي ودرت اللي عليا وما قصرتش وما هبطتش يدي وهادي هي الرياضة جيت لآخر حاجز كان عندي تعثر ما دزتش منو مزيان، حنا كنا دايرين حساب للسباق وديما واجد والتضحيات ديالي كبيرة طيلة السنة ومن بعد أولمبياد باريس خديت على العاتق ديالي باش نمشي ندافع على لقبي فبطولة العالم، الخطة كانت مدروسة اليوم وأنني خاصني نبقى في آخر السباق، وعرفت العدائين اليوم اللي موالفين كاينافسوني، الإثيوبيين ماشي في المستوى الكبير ولكن ما عندي ما ندير الاستراتيجية حتمت عليا نبقى في آخر السباق والخطة كانت ناجحة، وآخر حاجز تعكلت فيه وما قدرتش نشوف جاتني الضبابة فعيني وما بقيتش كانشوف، وقلت نرجع خطوة للور ولا نقدر نطيح وراني راضي بهاد الرباح وانا اللي حاس بقيمة هذه الميدالية اللي كانربح ونتمنى نزيد نحمر الوجه فالمستقبل لكل من يدعمني”.