مصطفى الشاذلي كود ////
الجمع العام ديال الوداد اللي كان خاصو يكون مناسبة للنقاش الجدي وتبادل الأفكار، تحوّل لحلبة مصارعة وكلاشات وضرب بالكراسي، فصورة ما كتشرّفش تاريخ النادي ولا جماهيرو. تسع ساعات ديال الجلسة فضحات بالعلالي أن المنخرطين والمكتب مع بعض الاستثناءات ما عندهمش المستوى باش يكونو في نادي كبير بحال الوداد.
المنخرطين اللي كيدعمو ايت منا خرجو بكري، اغلبهم مرفحين المهم عندهم بريستيج الانخراط في الوداد وما فاهمينش قواعد الجموع العامة وقوالبها، المعارضة جاو موجدين، عارفين شنو باغين: يحرجو ايت منا والمكتب ديالو اللي بانو ما عندهم خبرة باستثناء السياسي الديساوي والنقابي مرشيد.
البداية كانت عوجا من الأول، نقاشات فارغة على كل كلمة، مرة اللي ضد كيولي مع، واللي مع كيولي ضد، وفي الأخير كيتصوّت بالإجماع بحال شي حلقة فجامع لفنا. من بعد التقريرين المالي والأدبي والتصويت عليهم بالإجماع، جا النقاش على منخرط متهم بسبّ أيت منا. تعرض الفيديو اللي فيه الواقعة، وبدا الجدل، شي كيطالب بالتشطيب، شي كيرفض، والعقلاء كيحاولو يلقاو حل وسط.
لكن وسط داك الشدّ والردّ، جوج منخرطين قلبوها بونية، ومنخرط ثالث ضاسر، بوه بوليسي، شدّ كرسي وضرب بيه منخرط آخر، فلقطة دازت فالبث المباشر قبل ما يتقطع البث وينسحب صاحب الفعلة من القاعة.
المكتب بقى كيبان مهزوز، وأيت منا بان ضعيف بزاف قدام الفوضى، السياسي الديساوي اللي بقا ثابت وعارف شنو كيدير، الحل جا من المحامي الزوات، عضو مكتب سابق، اللي اقترح استقالة المنخرط اللي دار المشكل، ومن تما الانتقال للنقطة الموالية ديال تحويل النادي لشركة.
لكن حتى هادي ما سالاتش بخير. صراخ، غوات، النتيجة: تأجيل النقطة ديال الشركة لجمع عام غير عادي غادي يتعقد فشهر، وفي الوقت اللي الراجا دوزو ملف الشركة بخير وعلى خير الوداديين ساؤوا للنادي ديالهم ولجمهورهم.
اليوم الوداد لقات راسها فواحد الوضع اللي فيه المكتب والمعارضة كيبينو أن ما كاينش مستوى حضاري ولا وعي بقيمة النادي. بعد سنوات ديال الناصيري، بان أن “لخلا” وصل، وأن الوداد محتاجا مشروع جديد، ناس جداد، ورؤية كتعكس حجم وقيمة الفريق.