وكالات//
من بعد سنين طويلة ديال البحث فأعماق بحيرة ميشيغان فأمريكا، الباحثين لقاو حطام ديال “سفينة الأشباح” اللي غرقت فواحد العاصفة قوية تقريباً من هادي 140 عام، قدّام سواحل ولاية ويسكونسن.
جمعية ويسكونسن التاريخية وجمعية آثار الغوص فـنفس الولاية علنو أن الفريق اللي كيترأسو الباحث بريندون بايلود هو اللي لقى الحطام ديال السفينة اللي سميتها “إف. جي. كينغ”. وبايلود صيفط رسالة لوكالة “أسوشيتد برس” قال فيها بللي الحطام تلقى فـ28 يونيو.
الفريق لقا السفينة قرّيب من ميناء بيلي، وهي بلدة صغيرة فيها تقريبا غير 280 نسمة، وكاينة فـشبه جزيرة دور اللي كتمتد وسط بحيرة ميشيغان، وكتعطي لولاية ويسكونسن الشكل ديال كف مع إبهام بارز.
السفينة “إف. جي. كينغ” كانت سفينة شراعية للنقل، فيها ثلاثة صواري، والطول ديالها كيوصل لـ43.89 متر (يعني 144 قدم)، وتصاوبات فـ1867 فمدينة توليدو، ولاية أوهايو. كانت كتنقل الحبوب وخام الحديد.
الباحثين كانو كيقلّبو عليها من السبعينات، ولكن الروايات ما كانتش واضحة على البلاصة اللي غرقت فيها، وهادشي خلا البحث ياخذ وقت طويل.