گود سبور//
ما قدروش الوداد الرياضي يربحو اتحاد يعقوب المنصور الصاعد الجديد للقسم الاول من البطولة الاحترافية، وتعادلو معهم اليوم الجمعة فالتيران الاولمبي بالرباط برسم الدورة 2.
وسالا الماتش بين الوداد الرياضي والمضيف ديالهم اتحاد يعقوب المنصور بنتيجة التعادل الايجابي واحد لواحد، وماركاو يعقوب المنصور هما الاولين عن طريق مهدي بالوك فالشوط الاول وبقاو محافظين على تقدمهم حتى سالا، والوداد رجعو فالنتيجة خلال الشوط الثاني وماركاو هدف التعادل بواسطة الجنوب إفريقي لورش، مع العلم ان الحكم ياسين بوسليم تراجع عن احتساب بينالتي لكل فريق فالشوط اللول بعدما رجع للـVAR.
الماتش بين الوداد الرياضي ويعقوب المنصور عرف حضور كبير لجماهير الوداد، بعدما خصصت لها ادارة يعقوب المنصور 1600 تذكرة، ولكن بزاف ديال الوداديين لقاو صعوبات باش يوصلو للتيران وحسب مصادر كان المشكل فين يصطاسيونيو طوموبيلاتهم، وهذا الشي اللي خلاهم يدخلو معطلين للتيران.
وبهذه النتيجة خداو الفراقي بجوج نقطة لكل واحد فيهم، ورفع الوداد الرياضي الرصيد ديالو إلى 4 نقاط، محتل المركز الثاني مع الجيش الملكي والرجاء الرياضي، أما يعقوب المنصور خداو اول نقطة هذا الموسم بعدما خسرو فالدورة الاولى مع ليفار.