گود سبور//
كايعيوش الفراقي ديال كازا الرجاء والوداد الرياضيين واللي هما الكبار فالمغرب، وضع صعيب مع انطلاق هذا الموسم الجديد، وغضب كبير من الجمهور ديالهم بسبب المستوى اللي بانو به فالجوج ماتشات اللولين من البطولة الاحترافية، واخا ربحو ماتش وتعادلو فماتش ومازال ما خسروش.
مستوى الرجاء الرياضي فالماتش الاول مع الفتح الرياضي واخا ربحوه بجوج لزيرو والمستوى ديال الفريق ضد الجيش الملكي فالماتش الثاني اللي تعادلو فيه زيرو لزيرو بقلب دونور، والطريقة اللي لعبو بها الرجا، خلات اقالة لسعد الشابي مطلب من جمهور النادي، وتبين للرجاويين أن المدرب التونسي هو بالفعل مدرب ازمة ممكن يديبانيك ويعتقك، ولكن ماشي مدرب اللي ممكن يبني ليك فريق تنافسي ومنافس على الالقاب، وان الاستمرار ديالهم معه كان خاصو يسالي مع نهاية الموسم الماضي، ودابا المكتب المديري للرجاء برئاسة جواد الزيات خاصو يقلب على بديل بمستوى وطريقة لعب الرجا، ومن أبرز الأسماء المرشحة حاليا وأقربها لتدريب الحضرا، هو الجنوب افريقي فادلو ديفيز المدرب المساعد السابق بالرجا اللي ربح الدوبلي مع الفريق فالطاقم ديال المدرب الالماني جوزيف زينباور الموسم قبل الماضي ايام الرئيس الأسبق محمد بودريقة، وقدر فادلو ديفيز يوصل سيمبا التنزاني الموسم الماضي لفينال كأس الكونفيدرالية لاول مرة فتاريخهم.
وإلى كان جواد الزيات فالرجا خاصو يحيد المدرب لسعد الشاب ويجيب بديل احسن منو، فهشام ايت منة رئيس الوداد الرياضي راه خاصو يمشي هو براسو بحالو ويدي معه المدرب امين بنهاشم قدامو ويعطي للحمرا التيساع، بعدما تبين مرة اخرى انه ما قادرش يسير الفريق بطريقة مزيانة، ونفس أغلاط الموسم الماضي مع المدرب الجنوب إفريقي رولاني موكوينا، كايشوفوها الوداديين كاتعاود فهذا الموسم مع بنهاشم، والوداد بعد اجراء 2 ماتشات واخا ربح الاول ضد الكوكب المراكشي بواحد لزيرو، وتعادل فالثاني مع يعقوب المنصور بواحد لواحد، بان فريق مهزوز بطريقة لعب ماشي ديالو اما جوج فراقي يالاه طالعين من القسم الثاني، ولاعبين الواك ما قادرينش ينساجمو مع أسلوب الفريق، وأغلبهم دايخ وسط التيران وما لاقيينش حلول لا هما لا المدرب بنهاشم اللي دارو ايت منة مع نهاية الموسم الماضي واللي كايدّعي ان الرئيس ديالو عطاه الصلاحيات كاملة باش يجيب اللاعبين اللي بغا ويصيفط اللاعبين اللي بغا بحالهم، ولكن الفريق بهاد النيفو وهاد اللاعبين اللي عدد منهم ماشي بمستوى الوداد، بان انه صعيب عليه بزاف ينافس على جوج واجهات محلية فالبطولة وكاس العرش وقارية فكاس الكاف، والأخطر هو ان استمرار ايت منة على راس الوداد وغادي غير يزيد يغرق النادي اللي أصلا غرق معه ملي جا شد الرئاسة ديالو، وهو براني عليه، وحجم الغضب ديال الوداديين على التسيير ديالو راه عربون على انهم ما بقاوش قادرين يتحملوه هو والفشل الدريع ديالو، بعدما خرجت الحمرا الموسم الماضي بزيرو لقب وبظهور كارثي فكاس العالم للاندية.