بني ملال كود//
مات شابا اسمو حسام عندو 18 عام، صباح الجمعة 19 شتنبر 2025، بعدما تضرب بقرطاسة فمحاولة للهجرة من الجنوب ديال المغرب، بالتحديد حدا مدينة بوجدور.
حسب معلومات من عائلة الضحية، الشاب اللي جا من جماعة فم أودي نواحي بني ملال، خرج من الدوار ديالو قبل حوالي جوج سيمانات و مشى لمدينة العيون باش يحاول يهاجر سرّياً، وكان آخر اتصال دار مع عائلتو قبل ثلاثة أيام من هاد الحادث المأساوي.
المصادر قالت أن الضحية كان مع مجموعة ديال الشباب المغاربة ومهاجرين من دول إفريقيا جنوب الصحراء، وكانو مستعدين يركبو فزودياك د الحريگ فالساعات الأولى ديال نهار الجمعة، قبل ما ضربو قرطاسة على كتفو و تقتلو.
الأسرة قالت أن الحادث خلاهم مصدومين، خصوصاً أنه الابن الوحيد لي عندهم، وطلبو يفتحو تحقيق معمق باش يعرفو شنو وقع و شكون المسؤول، ويسرّعو فإجراءات نقل الجثمان لبني ملال باش يدفنوه.
