سهام البارودي – كود///
وا الصراحة كان خاص يوصل هاد النهار لي غايتم فيه إدماج أباطرة السوشل ميديا فالمشهد الحزبي المغربي و مايبقاش الوجود ديالهم محصور فالعالم الافتراضي، خصوصا و أن عدد المتابعين ديالهم داخل و خارج أرض الوطن يفوق عدد المصوتين على الأحزاب المغربية لي مات ليها الحوت و عايشة بالتنفس الاصطناعي من التسعينات.
غير اللايڤات ديال الفقيه فالتيكطوك راه كايحضرو فيهم أكثر من داكشي لي كايجمع الاتحاد الاشتراكي فالمؤتمر الوطني ديالو فبوزنيقة، و بلا صداع بلا مضاربات بلا تشيار بالكراسى و بلا طباسل ديال الدجاج محمّر.
داكشي علاش فاش سمعت خبر ترشّح مايسة مع الحزب ديال الرفيق نبيل بنعبد الله، تخايلت دابا گاع المشاهير ديال السوشل ميديا كون بغاو يدخلو لغمار السياسة، شكون أقرب حزب سياسي ليهم :
– هيام سطار: معروفة هاديك حزب السبولة، الحركة الشعبية و تقدر تزاد معاها تا مّي نعيمة و قناة مربوحة و گاع اليوتوبورات صحابات البوادي و المداشر
-ميمي طاق طاق: غاتكون مع الأحرار حيت الصيكان د شانيل و الكساوي ديال ديور و الگولف ماغايجيو الا مع حزب رجال الاعمال
– الفقيه ديال تيكطوك مع الفقها ديال البيجيدي هادي باينة
– رضى ولد الشينوية مع الاستقلال فرع سيدي علي بن حمدوش
– الراقصة مايا : باينة هاديك مع الاشتراكي الموحّد مع نبيلة منيب باش دافع على الحريات فخاطرها
– الاتحاد الاشتراكي هاداك خاصو صوفيا طالوني واخا الصراحة الأصدقاء ديال الاتحاد الاشتراكي قاليك سيفطيه للبيجيدي هوما لّي يجي معاهم و الله اعلم ثاني
-غايبقى الأصالة و المعاصرة و ماغايلقاش احسن من سكينة بنجلّون تمثل الثنائية المتضادّة ديالو أحسن تمثيل في قبة بويا… البرلمان