گود سبور//
نادي سبورتينگ الدار البيضاء النسوي، اللي قدر خلال سنوات قليلة من التأسيس ديالو عام 2019، أنه يحقق إنجازات مهمة فالكورة النسوية المغربية من بينها بلوغ دوري أبطال إفريقيا عام 2023، ولعب أدوار متقدمة فالبطولة المغربية، يواصل هذا النادي الخطوات ديالو للمساهمة فتوسيع قاعدة كرة القدم النسوية تحت إشراف الجامعة الملكية المغربية لكرة القدم.
وطلق نادي سبورتينگ الدار البيضاء المتخصص فالكورة النسوية، أكاديمية 100% نسوية موجهة للبنات اللي عندهم من 5 سنين حتى 17 عام، والهدف من هذه المبادرة حسب النادي هو توفير بيئة احترافية وعصرية لتكوين نجمات المستقبل فكرة القدم النسوية، غايستافدو اللاعبات من تأطير تقني عالي المستوى، بإشراف طاقم من المدربين المتمرسين، وبمواكبة من جيري تشابالالا، اللي يعتبر من أفضل مدربي القارة الإفريقية فالكورة د العيالات، واللي دابا هو مدرب ديال سبورتينگ الدار البيضاء، بعدما سبق له وربح دوري أبطال إفريقيا 2 مرات مع ماميلودي صن داونز الجنوب إفريقي وكان خدا جائزة أحسن مدرب فالكورة النسوية الأفريقية عام 2023.
هذا البروجي ديال سبورتينگ الدار البيضاء، كايبقى مهم بزاف خصوصا وأنه كايجي فهاد الوقت اللي خدامة فيه الجامعة الملكية المغربية لكرة القدم، على الرافع من مستوى كرة القدم النسوية المغربية، وغايشجع أندية أخرى باش حتى هي تفتح أكاديميات لكرة القدم النسوية، وما يبقاوش منحاصرين غير على كورة الرجال.