وكالات//
تعرض الممثل البريطاني توم هولاند لارتجاج خفيف فالمخ، ملي كان كيصور واحد المشهد خطير فالفيلم الجديد ديالو Spider-Man: Brand New Day، فاستوديوهات ليفزدن اللي كاينة فمدينة واتفورد فالمملكة المتحدة، نهار الجمعة اللي فات.
و على حساب تقارير إعلامية أمريكية، توم هولاند اللي عندو 29 عام، خرج من بلاصة التصوير من بعد الإصابة وتنقل للمستشفى، وما كانوش إصابات أخرى فطاقم العمل.
جريدة “ذا صن” قالت باللي هولاند حضر فالغد فواحد العشاء خيري مع الأب ديالو وخطيبتو وزميلتو فالفيلم زندايا، ولكن اضطر يخرج بكري حيت حس بالإرهاق.
ومن بعد هاد الحادث، وقفو التصوير مؤقتاً، وتوم هولاند غادي يرتاح شي أيام، بينما شركة “سوني بيكتشرز” اللي خدامة على الفيلم مع استوديوهات مارفل، دارت اجتماع باش يقررو شنو يديرو من بعد.
الفيلم متوقع يخرج فشهر يوليوز 2026، وغادي يكون هو الظهور الرابع ديال هولاند فدور “سبايدرمان.
وكاينين معاه فهاذ الجزء الجديد بزاف ديال النجوم، بحال زندايا، جاكوب باتالون، مارك روفالو، جون بيرنثال، ومايكل ماندو، وحتى وجوه جديدة بحال ليزا كولون-زاياس، تراميل تيلمان، وسادي سينك.