كود- كازا//
بعدما تعرف وتشهر بأسلوبه الجريء ف السينما وبطريقته النادرة ف الكتابة بالفرنسية وحتى العربية، قرر المخرج والكاتب المغربي هشام العسري يقتحم الكتابة الأدبية بالدارجة، لغة المغاربة الحقيقية.
أول منتوج أدبي بالدارجة للعسري اختار ليه كعنوان “هايش مايش”، وماصنفوش لا ف الرواية ولا القصة القصيرة بل غير مونولوج..
وكما اختار طريقة واقعية وصادمة وجريئة ف السينما اختار أيضا طريقة جميلة للسرد بالدراجة.
هايش مايش اللي اطلعات عليه كود جات بحال أسلوب الواقعية السحرية ديال الكاتب الكولومبي الراحل كابيريل كارسيا ماركيز اللي كايخلط أحداث تاريخية وقعات مع شخصيات متخيلة.
ولا بحال أسلوب المخرج الامريكي تارنتينو اللي كايبغي يعاود يكتب التاريخ بطريقته بحال الا كاينتقم منه او كايحاول يخلقو من جديد.. بحال ملي قتل هتلر ف حريق سينما ف فيلم انكلوريوس باستردس . ولا ف فيلم كان يامكان ف هوليود ملي غير احداث مقتل مراة المخرج بولنسكي.
هايش مايش حكي متسرسل لشخصية مغربية قحة الا قرينا حكيها كل واحد فينا غادي يتخيل انه تلاقاها بصح. بدون وصف لملامح الراواي غير غادي تقراو السطورة الاولى غادي تخليوه، حيث كل واحد فينا شي مرة تلاقا بهاد الهايش ماش.. شخصية هامشية مامسوق ليها حد ولكن بقوة الخيال والحكي كتخلي راسها هي محور التاريخ والكون والحياة..
المونولوج هايش مايش فيه الواقعية السحرية مع الخيال مع الكدوب مع الواقع: وربما غادي تكون لأول مرة رواية بالدراجة كتهضر على التاريخ المعاصر ديالنا وكتساءل احداث وقعات فيه بحال المسيرة الخضراء وغيرها..
هشام العسري اليوم بهاد المنتوج الأدبي اصبح من الأصوات القليلة فالمغرب اللي مزال كتقدر تواجه السلطة بكل أنواعها حتى سلطة الجمهور..
ماخصناش ننساو أن النهضة الادبية والعلمية راه كتدار باللغات المحكية الحقيقية للشعوب، واكبر مثال الاوروبيين ماتقدموش حتى لاحو اللاتينية وبداو يكتبو بلغاتهم المحكية.
وحنا ف كود كمنبر اعلامي تبنا الدارجة من النهار الاول ونشر ابداعات كثيرة بها حاول يصالح المغاربة مع لغتهم، فرحانين بزاف بهاد المنتوج الكبير ديال هشام العسري.. وقررنا ننشرو منه شوية المقاطع على حلقات قصيرة، وكنشجعو كل المغاربة يشريو الكتاب ويقراوه.