كود هناء ابو علي ////
البارح قالت ادارة الموقع الاخباري “برلمان.كوم” باللي نهار لخميس 18 شتنبر 2025 جا لمقر الموقع فحي اكدال فالرباط 13 شخص ومعاهم القوات المساعدة. ياك لاباس؟ قالت ادارة الموقع باللي هاد الشي كولو على اشغال بسيطة فيها صباغة دارها الموقع. وباللي هاد الشي تخبر بيه “السانديك” اللي متبع عن طريق رئيسة جكعية سكان العمارة كلشي.
دابا السي لفتيت رسلتي فرقة كلها لموقع سبق وانتاقدك وانتاقد سياستك. ما مشيبتيش للقضاء بحال دار ولد عم سيدنا هشام العلوي اللي قرر يقاضي اليوتوبرز رضى الطاوجني والقضاء غادي ينصف المتضرر. هاد الطريقة اللي دارت اجهزة تحت اشرافك كتطرح اسئلة.
مزيان ان عيون السلطة حاضية كلشي, وبغينا غير شوية من هاد لعيون تشوف اش واقع فعين الدياب مع اسماء حاكمة عين الدياب. هادي حسب محضر وقعو فؤاد الكرتي الباشا رئيس الملحقة الادارية الساحل 14 التابعة لعمالة مقاطعات الدار البيضاء انفا، راها فيه امر باش تنهي مخالفات فمطاعمها بعين الدياب “ڤيراندا” و”تشيلو”. عيط للقايد يعطيك عدد المخالفات الخطيرة ولا بلاش عليك نشروها هنا تشوفها.
هادي جاها امر ف13 يونيو 2025 وتبلغات عبر مفوض قضائي بعد 4 ايام ودابا حسب غير انت شحال داز ديال الوقت وما وقع ليها والو. كيفاش 13 عنصر لموقع اخباري مع القوات العمومية وهادي بنات بواط سو سو صول اي تحت تحت ارضي بلا رخصة بلا والو وكيجيوها يوميا كليان بالاضافة الى مخالفات كثيرة.
وبين حنة يدك وطبق غير القانون بناء على محضر ديال ناسك.
باش تسالي اجي تشوف اش واقع ف”مارينا” كازا. الروينة. ما تسخسخش، جي مباشرة ل”اوسيان 2″ كاين الرجل القوي هشام اللي شرا فالطابق 10 جوج ديور وجمعهم. بدا الاشغال فاللول فنونبر 2024 بلا رخصة وكاين محاضر عن السلطات المحلية ومن بعد خداها غير على اشغال ماشي على يلصق شقة بشقة. رونها وتسبب فمشاكل تقدر تريب العمارة كلها وجاو ناسك ولكن ما وقفش. خرج قرار بهاد الشي ولحد الان 23 شتنبر 2025 مازال خدام.
فالطابق 7 دار نفس الشي ولد وزير اول سابق. بدا الاشغال ديال الترياب بلا رخصة ومازال مرونها وما جاوهش 13 عنصر والقوات المساعدة. فالطابق 4 ناضو قسمو شقة ل4 لبنيقات كيكريوهم عبر “ار بي ان بي” وما عمر شي حد فالسلطات جا عندهم.
كيفاش ترسل جيش من افراد السلطات العمومية لصباغة. معاك خاص تطبيق القانون فكلشي، ونفس الناس دياولك طالقينها فكازا وحتى باش يخرجو قرار وبيدهم التطبيق ما كيطبقوهش. حوايج كثيرة ما راكباش يا وزير الداخلية