هشام العسري//
أنا في الأول كنت باغي غير نتصنت لعظامي…ما عاندي والو…مــا خـاصــنـي تــا حاجة…و هو ما يطلقو الإشاعة قالك خاصهم بنادم للمسيرة الخضراء…
أنا مرّة مرّة كنت تندير لافيگوراسيو في السينما… درت فيلم مع جون هيوستون ملي صورو في المغرب كنت غانكون أنا هو البطل… عجبت مزيان جون هيوستون حيـــت كـــان عندي الفورمة، كنــت قـديـم فـي الليـگـة… و جــون هيوستون كــان بوكسور الابــاز … الساعة المركز السينمائي تدخل فهادشي… بغاو شي عميل ديالهم حيــت الفـيـلـم كـــان سميتو (الرجل الذي أراد أن يكون ملكا … كيفاش؟! الرجل الذي الذي أراد أن يكون ملكا !… هنـا فـي الموغريب ؟! يـاك لابـاس ولا شنو… أما كــون أنــا دابــا ستار… كعما نحاشيها ليكم.
الساعة وقف ليا العربي الدغمي في الميمون تاعي… الفيلم ملي خرج للسينما … فالعالم كامل كان سميتو (الرجل الذي أراد أن يكون ملكا و فالموغريب سماوه (الرجل الذي أراد أن يكون إسكندر) … زعمــا بعـدو على المخزن الله يرحم باباكم… عرفتي داكشي كان شوية حساس… يلاه دازو جوج إنقلابات.. … و حيـت مــدوز لافیگوراسیو عرفت أن هاد القضية تاع المسيرة الخضراء غاتكون شي حاجة فشي شكل . حنا ملي كنا كنلعبو الرومان… ولا الكفار ولا الهنود… كنا إلا كثرنا تكونو ميتين ولا تلتمية تاع الخلق… تنموتـو غـيـر بالعطش و الجوع… و الشمس… و كنا تنخدمو غير يومين ولا تلتيام و تا نمشيو مـراض… داكشي علاش قلت مع راسي آش داني نمشط للقرع راسو … بغيت نتخبــا… آش داني لشي مسيرة أنا يلاه سهل عليا الله و شريت موطور سونتروا… هزيــت بـــه رجلي من الغيس و الغبارية… قال ليك المسيرة … آاااش داني نخضر شي مسيرة . أصلا ما كاين خضورية قتلنا الجفاف و الجراد… المشكيل لي كان عندي هوما الواليدين… مي بغاتني ندخل لجدارمية… الواليد بغاني ندخل سوق راسي كان خايف غير لندير شي نباص و نسيفطو للغباق … ديك الوقت كان كولشي على سبة باش بنادم يغبر تقدر غير تلبس البلغة مقلوبة و يغبروك… داكشي تـــاع أبراكدابرا فالبراكة… الواليد شرا واحد البراكة ما فيها براكة كنـا غـيـر تنتشواو تحت القزديـر… تنـدوزو سطاج تاع جهنم… و فالبرد تاتفيقنا القطرة… جــاب الله كـــان الجفاف… الديور كانو غير من الكرطون… جاب الله الواليد مات قبل إضراب كوميرة أما خواف كيف كان… والله تا يسيفطني ترونسفيري… كـان بـاغـي غيـر منـين يدوز ليــا…. كــانـو سـنانو لوبيا عليا… جيعان و مزلوط كان تيدوز بيـا الوقـت تـا تجـي فيه القرعة تاع المريكان ولا يجيب شي تيرسي… بنادم كان حــانـي الـراس تيدير جوج خطوات و يتعكل… يجـي علـى زنافرو… أنا ديما تانقول المشكل هوما الواليدين، بنادم إلا محفحف علاش يعرض عليك للدنيا … هو معذب ويجيبـك تـا تعذب معاه… علاش ؟! ملي كتجي تسول هاد الواليدين تايقولو ليك كلا واحد تيجي برزقو… هـو طامع فيك تحسن ليه الوضعية … بحال إيلا نتا ما جيتيش من كرش مك… جاي من الطاليان… و النهار لي سهل عليا الله و وليت كومبارس مع النصارة كنت نقدر ندبر على شي نصرانية تديني معاها الساعة تـا وحـدا مـا بغات واخا عندي اللغة و الفورمة … و ديك الساعة كان باقي عندي الشعر… ولكن الزين لي ما كانش… كانت طايحه ليا سنة القُدام و ديمـا كنـت كنجـي غـيـر مــع الطلابة…. الكفار و العبيد… حيت الفاتشا سينمائية … الناس لي كانو زوينين تايديروهم مع المسلمين، الرومان و الأغنياء… كنت كنحس بالضيم… ولكن ملي تانشـــوف الواليد… مروكي راسو طويل والواليدة دايرة بحال شي مُدرعة ماتعرفها واش غادة ولا جاية واش واقفة و لا جالسة واش تتضحك ولا تتاكل… تنقول بالسيف أنا طلعت تنشبه ليهم بزوج… المهم تقلقت شوية واخا هكاك عزيز عليا واليديا دابـا ملــي ماتو… و خـلاو بلاصتهم… الله يرحمهم إيلا دارو شي حاجة ترحم عليهم… أمــا أنــا باقي ما مسروطاش ليا… القراية والو… الرفاهية والو… تـا مـن الجينـــات مـــا هوماش… حكمو عليا نبقا كومبارس حتى فالحياة اليومية ماشي غير فالسينما… علاش كُنــا تنهـضــرو أه على المسيرة الخضراء…
