أنس العمري-كود///
من نهار الزلزال الصحي لي ضرب الصحة فسوس، على إثر الاحتجاجات القوية على الوضع الكارثي لسبيطار الحسن الثاني، تبدلات حوايج كثيرة فالقطاع بالجهة.
فمع تعيين الدكتور جبار مرتضى مديرا جهويا جديدا للصحة قبل حوالي 15 يوم، والقطاع بسوس عرف تعبئة كبيرة وتحرك ملموس.
مستشفى الحسن الثاني كان واحد من المرافق اللي شملتها هاد التحولات، حيث دخلات تجهيزات طبية حديثة وتبدل جو العمل داخلو.
سكانير جديد وتجهيزات متطورة
حسب المعطيات لي توصلتت ليها “كود”، مجموعة من التغييرات والتحسينات ولاو واضحين للعيان داخل “سبيطار الموت” فالأيام الأخيرة. تنظيم الاستقبال أصبح أفضل، والمرتفقين كيتوصلو بمواعيدهم ووثائقهم الإدارية بلا تأخير، ما كيعكس تحسنا ملموسا في التسيير والتدبير.
الأجنحة الطبية كذلك تعززت بمعدات متطورة، أبرزها جهاز السكانير الجديد، اللي غادي يرفع من جودة التشخيص الطبي ويقصر فترات الانتظار اللي كانت عبئا على المرضى قبل.
ووفق معطيات “كود”، جهاز سكانير جديد وصل البارح الجمعة للمستشفى، وتمت كل الترتيبات التقنية باش يشتغل، قبل ما تنطلق دورة تكوينية ابتداء، من الثلاثاء المقبل، لفائدة تقنيي الصحة المكلفين بتشغيلو مع الحالات المرضية.
وما توقفش التحسن عند الجانب الطبي فقط، بل وصل حتى للجوانب اللوجستيكية، حيث أن رجال الأمن الخاض ظهروا لابسين لباس موحد، وفرق النظافة ناشطة والحركة ديالها واضحة، مع رائحة مواد التنظيف اللي كتأكد على الحرص على النظافة والسلامة.
هاد التحسينات كلها جاو ضمن سلسلة إجراءات عاجلة باش تتجاوز الاختلالات السابقة وتطوير الخدمات بشكل سريع. عدد من المرتفقين كيتفقو على أن المستشفى حاليا كيعيش دينامية جديدة كتبعث على الأمل، والساكنة كتثمن هاد الجهود اللي واضحة فالخدمات اللي كيتلقاها المواطنين.
هاد المبادرات الجديدة لقيت استحسان كبير عند الساكنة، واللي بداو يلاحظو فرق كبير مقارنة بالفترة السابقة.
هاد التغييرات الكبيرة ما طوتش غير صفحة سوداء في قطاع الصحة بالجهة، بل أطفأت فورة الاحتجاجات اللي كانت كتعيشها الساكنة لفترة طويلة، حيث تحققت معظم مطالب المحتجين وأصبح من الصعب إيجاد مبرر لاستمرارها، إلا إذا كانت هناك نوايا غير معلنة من طرف جهات معنية خدمة لأجندات تستهدف ضرب في صورة المغرب.
