محمد سقراط-كود///
حتى إلى كانوا هاد الدراري غير صغار ومعندهم عقل وبغاو يقلدوا نيبال وأندونيسيا، إذن المخزن خاص يكون مول العقل وميقلدش نيبال وأندونيسيا ويقمع الإحتجاجات، دراري خرجوا للشارع يطالبوا بشي حاجة واخا تكون البوكيمون خاص الدولة تسمع ليهم ماشي تقمعهم، الإحتجاجات في أندونيسيا كبرات من بعد ما البوليس تدخل بشكل همجي وقتلو واحد الليفرور مكان عندو علاقة دازو فيه بطوموبيل البوليس والفيديو موثق ونتاشر، هنا فين زادت شعلات وزاد تأجج الشعور بالغضب عند الجماهير لي مكونة أصلا من شباب محبط ولكن متريني ومريكل وقافز، وهوما ينزلوا حرقوا المدينة وتخامجوا مع البوليس ضربة فيا ضربة فيك، في نيبال هاكة وقع بداو البوليس يضربو بالقرطاس في الشباب ماتوا شي عشرين، نزلوا لغد ليه حرقوا البرلمان والكوميساريات وديور المسؤولين، وجراو على الحكومة ودارو انتخابات في ديسكورد وشطبوا الدنيا وجمعوا وطواو.
من أذكى مادار المخزن أيام عشرين فبراير هو أن التدخلات العنيفة كانت قليلة وحتى الإعتقالات، وبقى مخلي الناس تخرج تنفس كل نهار لحد حتى عياو وكل واحد فين عطى الراس، المقاربة الأمنية في العالم وخصوصا في العصر الحديث فين الأنترنيت كيفضح كولشي، ولكن هاد المرة مال المخزن باغي يرجع بالتاريخ اللور، بنادم كيعطي تصريح مكيكملش جملة حتى كيجروه البوليس للسطافيط، مالنا على هاد أجواء سنوات الرصاص، أييه داك الساعة كانوا كيتعذبوا في المعتقلات السرية وكدا، ولكن راه الحجر على حرية التعبير راه تعذيب في حد ذاتوا، طبعا حرية التعبير بالنسبة ليا مكتشملش المتطرفين الإسلاميين.
شباب خرجوا يعبروا على صوتهم من حقهم وماخاصش يتقمعوا، واخا الصراحة أنا جاوني مطالبهم غير منطقية ومكتمتلش جيلهم، وحتى خطابهم وصفحتهم فيهم روح البومرز والشكل ديال جيل زيد وصافي، أولا كيكتبوا بالعربية ديال لعلى وما إنفك ومافتئ، تانيا مطالبهم ديال الشراف والمتقاعدين ومالين الولاد، نتا جيل زيد في العشرينات من عمرك آش غادي تقود بشي سبيطار وعلاش خاص تعرفوا فين جا أصلا، خاص تكون ناشط وفرحان وقدامك مستقبل، ومطالبك خاص تكون خدمة مزيانة ظروف عمل محترمة، أمن وظيفي، وتخرج تعربط على حقك في الحرية، حقك في الإعتقاد والنيك والإبداع والعيش بنمط مختلف بلا مايتدخل القانون في ميولاتك الجنسية أو عقيدتك، راه هادشي علاش خرجوا في النيبال وأندونيسيا وبانغلاديش وهادشي علاش كيخرجوا الشباب، أما السبيطارات والتعليم هادوا نضالات الشراف وراه ضيعوا فرصتهم شحال هادي.