كود هناء ابو علي ////
شباب يتأثر من حركات احتجاجية عالمية حاجة عادية. شباب يحتج على اوضاعو امر طبيعي واللي ماشي طبيعي هو هاد الشباب ما يتسوق والو. طبيعة هاد المرحلة فالحياة هو الثورة والاحتجاج.
فالمغرب كانت اشكال احتجاجية فبعض المدن خاصة الرباط وكازا السبت والاحد. ما كانوش وقفات كيف تم الدعوة ليها. باش تخبرو باللي راها غير مرخصة بدات اعتقالات. كانت شي تدخلات ديال القوات العمومية مبالغ فيها بزاف. “كود” كلات حقها بعد ما تعرض المصور الصحافي حسني دكالي لاعتداء فرجلو من القوات المساعدة البارح 28 شتنبر 2025 بالرباط.
جمعيات حقوقية نددات بهاد التدخل.
لكن واش هاد الشباب داير هاد التنظيم بوحدو؟ طبعا اللا. من الغباء فشي حركة كتقول بلا راس بلا توجه سياسي يكون عندها سيرفر ديال لحرايفية ومنظم مزيان. غير واحد الصلة خلقات الارتباك. كيفاش هاد السيرفر GenZ مرتبط بحساب “جبروت” اللي كان خرج عدد من الوثائق كتهم مسؤولين كبار فاجهزة حساسة فالمغرب
اللي كيفهم فهاد الشي كيقول باللي مستحيل ولد 25 عام ماشي قل يكون عندو هاد التنظيم اللي عند السيرفر GenZ. فيه غرف وحدة للعمليات ووحدة للمعلومات واخرى للاخبار وعندهم 12 غرفة جهوية بعدد جهات المملكة.
هاد الشي كيبان احترافي. فنقاشهم كتلقاهم شي يصعد “باغي يحرگ” البرلمان وشي باغيها سلمية. حتى فتصريحاتهم كيف دار واحد منهم ل”كود” قال باللي باغينها سلمية ولكن عندهم plan B
ايلى هاد الشباب باغيها سلمية ومركز على الصحة والتعليم علاش جبد تنظيم كأس افريقيا اللي خذيناها هادي سنوات وعلاش جبد تنظيم المونديال اللي كل شباب العالم يفرح بتنظيمو. حدث كبير لهاد الفئة وللبلاد.
ايلى شفتو تغطيات الصحف العالمية لهاد الاحتجاجات اللي كانت عادية جدا كيبان الهدف. ركزو على تنظيم كأس افريقيا والمونديال.
فكرة الاحتجاجات نبيلة وبريئة وخاصها تكون. غير كيفاش تم السطو عليها من قبل شي جهة او جهات كيخلع. الهدف ماشي الصحة ولا التعليم ولا اخنوش.
واش كاين فشي محتج فالعالم كيجيب معاه رضيع وكيدير تدخل وهو عارف راسو غادي يطلع للسطافيط. فاي دولة، خاص ياخذو ليه المصالح الاجتماعية الرضيع ويتابعوه بتهمة تهديد حياة رضيع.
الاحتجاجات ديال الشباب خاصها تكون وتستمر. غير تكون واضحة فكلشي.