محمد سقراط- مختص في الشأن السياسي بجنوب شرق آسيا///////
في ستينات القرن لي داز، كان الحزب الشيوعي الإندونيسي هو ثالت اكبر حزب شيوعي في العالم من بعد روسيا والصين وكان قريب من السيطرة على الحكم، حتى ظهر المخلص محمد سوهارتو وبدعم من أمريكا دار إبادة جماعية للشيوعيين في البلاد مات فيها تقريبا مليون شيوعي، هاد الإبادة شارك فيها الشعب والجيش إيد وحدة والجماعات الإسلامية، من بعد سوهارتو غادي يجيب مجموعة من علماء الاقتصاد من جامعة بيركلي الامريكية غادي يتسماو بمافيا بيركلي، وغادي يديروا خطط اقتصادية للبلاد لي غادي تساهم في تحسين الاقتصاد وتنمية البلاد، ولكن في نفس الوقت غادي تعرف البلاد وحدة من اكثر عصور الفساد في التاريخ، سوهارتو غادي يجمع هو وعائلتوا والمقربين منو ثروة كتوصل لخمسة وتلاتين مليار دولار، عبر شركات ديال الاتصالات والطيران والعقار والأراضي، لدرجة ليومنا هذا الأراضي لي كتملك عائلتوا في اندونيسيا راه قد دولة بلجيكا كلها، هاد التنمية لي عرفاتها الدولة ستافدوا منها فقط رجالات النظام وعائلاتهم وهادشي لي خلى اندونيسيا تكون اكثر الدول الاسيوية لي غادي تعاني من ازمة النمور الاسوية الاقتصادية، لي غادا تضرب في أواخر التسعينات وسببات في احتجاحات كبيرة ديال الطلبة في البلاد خلات سوهارتو يستاقل ولكن بلا محاسبة تقريبا وفلوسهم بقات عندهم، وحتى رجالات النظام القديم هوما لي بقاو، خلفه صاحبوا نيت وهو لي عفى عليه، ولكن طلق حرية الصحافة والرأي والانتخابات، ومن بعد انتخابات وتقلبات سياسية راه ليومنا هذا رئيس اندونيسيا جنرال سابق وكان نجم في عهد سوهارتو ودار شلا بطولات في جزيرة تيمور.
اندونيسيا واخا تجاوزات ترليون دولار كناتج داخلي خام، ولكن راه عدد سكانها ميتين وسبعين مليون مجاتهمش حتى خمسة دراهم للواحد كنصيب من الثروة، وهادشي لي خلى الإحباط يصيب مختلف الأجيال في اندونيسيا لي من ديما كانوا عندهم حراكات ضد الديكتاتورية، راه في تنمية وتسعين خرجوا آباء الجيل زيد وقلبوا النظام وطيحوا الديكتاتورية، ولكن النتيجة بقات هي هي، نخبة صغيرة مستافدة من الازدهار الاقتصادي بينما البقية خدامين في ظروف شبه عبودية حديثة، شباب كيقرى ويتعلم باش يحسن من المستوى المعيشي ديالو في اللخر كيلقى راسو ليڤرور، عندهم تقريبا خمسين في المية من الشغيلة بعقود مؤقتة، يعني ريحة الأمان الوظيفي مكايناش، في نفس الوقت أبناء وأحفاذ السياسيين والقادة العسكريين وقادة المنظمات الإسلامية المسؤولة على قتل الشيوعيين في الستينات، كانوا مستافدين من فساد الدولة وعايشين في بحبوحة كيوثقوها يوميا في صور عبر انستغرام او فيديوات تيك توك، في نفس الوقت أقرانهم من ولاد الشعب كيتقاتلوا يوميا على وظائف قليلة ساعات عمل كثيرة، امان وظيفي منعدم ومنافسة شرسة، هادشي خلى الإحباط يكبر ويتضخم عند جيل زيد وقرر يخرج للشارع خصوصا بعد ماقرر البرلمان انه يزيد تعويضات خيالية حتى بالمعايير المغربية للبرلمانيين ديال السكن والسفر، هادشي لي فجر احتجاحات جيل زيد في اندونيسيا وكيف كتشوفوا مكاين حتى شي قاسم مشترك بين الوضع السياسي والاجتماعي بين اندونيسيا والمغرب، حاليا كنشوفوا جيل زيد خارج ولكن واش كيعيش نفس الإحباط لي عاشوه أقرانه في الدول لي خرجوا، واش حتى مطالبهم هنا منطقية واصيلة وكتهم جيلهم وطبقتهم الاجتماعية أو غير صرخة في ظل التجاهل وشوفونا راحنا كاينين، ونقصوا شوية من تاطبالت، وعلاش المخزن أصلا خايف منهم راه خروجهم صحي وفي دول خرى راه ديما الاحتجاحات على ايتها حاجة راه حق مشروع، علاش هاد المرة بالظبط المخزن كيتعامل بعقلية قديمة، ماشي خاصوا حتى هو مسؤولين من جيل زيد يعلموه كيفاش يتعامل.
بخصوص نيپال لي نجحات فيه ثورة الجيل زيد في قلب الحكومة وهرب الوزراء وحرق البرلمان، راهم على خلاف اندونيسيا لي نجحات في تطهير البلاد من الفيروس الشيوعي واخا بطريقة وحشية لا أتفق معها ولكن الأهم انها فعالة، الشيوعيين دوزو التسعينات كلها مضاربين على الحكم سواء بيناتهم او مع الملكية ودخلوا في حرب أهلية وثورة وخنادق وآلاف ديال الضحايا حتى قدروا الماويين يلغيو الملكية في البلاد، من بعد بداو كيتناوبوا هوما والماركسيين الينينيين على نكح البلاد والعباد اقتصاديا واجتماعيا، وهادشي راه غي في الالفينات، نيبال مسكينة كيطلقها العيان كيشدها المستاراح، وكي عادة الشيوعي أيا كان توجهه فاش كيوصل للحكم يستحلي الامتيازات الرأس مالية فعاتوا فسادا في البلاد ومباهاة بهاد الفساد، وطلقوا ولادهم كيتفشخروا في انستغرام وتيك توك حول المشتريات ديالهم، بلاد دوزات التسعينات والالفينات حروب اهلية ومشاكل سياسية وازمات شوية كتلقى ولاد وبنات هاد المسؤولين كيحطو فيديوات ديال الشوبينگ لي دارو من كبار دور الأزياء في العالم، صيكان هيرمس وليويس فيتون براهش بالفيراريات، وفاش بداو جيل زيد المحبط كيحتج على هادشي في المواقع الاجتماعية قررات الدولة لي باقا كتفكر بعقلية الحزب الواحد في الاتحاد السوفياتي أنها تسد مواقع التواصل الاجتماعي، هنا خرجوا الدراري من المواقع للواقع وحرقوا البرلمان وبدلوا الحكومة وختاروا رئيسة جديدة، وهذا تصاعد طبيعي في الاحداث فاش كيكون عندك مشكل حديث وكتبغي تحلوا بالطرق القديمة.
مايمكنش تكون عندك نظرة على الواقع الى ماقريتيش التاريخ وحللتيه، وعلى مايبدو ان حركة جيل زيد في المغرب هي استيراد ونقل لفكرة نجحات في بلاد خرى وفق شروط وظروف خاصة مكايناش هنا، وهادشي لي كان نيت في عشرين فبراير خرجنا حيت لخريين داروها اذن نجربوا حتى حنا، بلا منعرفوا علاش وكيفاش وشنوا خاصنا، وهادشي كان كيبان من المطالب سواء ديال حركة عشرين فبراير لي هي ملكية برلمانية محاربة الفساد الصحة والتعليم، وهادو مطالب فضفاضة وبصح معندها علاقة مع الناس لي خارجين، كذلك مطالب جيل زيد الصحة والتعليم ومحاربة الفساد، نفس الاغنية نفس الخطأ ولكن مزيان يعيشوا ويدوزوا الواحد ويخرج يصطادم مع مالين الوقت، العجيب بالنسبة ليا حاليا هو مادام ان مكاينش نفس المكونات والوصفة اجتماعيا واقتصاديا لي تخلي احتجاجات جيل زيد تكبر وتسالي بحال ديال نيبال مثلا، اذن علاش المخزن خايف ومربج وكيتعامل بطرق قديمة، ياك كاينة حكومة منتخبة ديمقراطيا في هاد البلاد وا تهبط تشوف الدراري آش بغاو، عوض هاد المقاربة ديال المقدمية والمخزن والزرواطة والسطافيط وشد بنادم ديه للكوميسارية، خليو الشباب يفوج ويستفرغ ويحتج وينشط، راه هذا هو مناخ العيش الصحي في الدول المتقدمة، فرنسا كيوقع فيها ميتين احتجاج في العام كل مرة علاش، كذلك ميريكان ها اليمين ها اليسار ها صحاب الحلزونات ها جميع أنواع واشكال الاحتجاج راه كاع دخلوا لمبنى الكابيتول، ومع ذلك راها اعظم دولة في التاريخ، الحرية راها زينة والمقاربة الأمنية كتزيد تأجج الوضع عوض تطفيه، راه المخزن معندوا مناش يخاف حنا ماشي نيبال ولا اندونيسيا ومعشماش نفس تاريخهم ومعندناش نفس ظروفهم.