محمد سقراط-كود///
الى مشيتي لأي سبيطار ديال الدولة غادي تلقى الفئة الكثيرة ديال المرضى من الفئات الشعبية والفقيرة وبزاف منهم من البوادي والمدن الصغيرة المجاورة، مثلا المستشفى الجامعي هنا في فاس غادي تلقى الناس جايين من تاونات من نواحي تازة ميسور كاين حالات من الراشيدية ميدلت، وهادو هوما الناس لي كيتكرفصوا ويتعذبوا غير باش يوصلوا لأقرب سبيطار ويشدو رونديفو ديال شهور ويسافروا باش يديرو السكانير، ومع ذلك في هاد حراك جيل زيد مكتلقى حتى واحد من هاد المتضررين المباشرين من مشاكل قطاع الصحة كيحتج وخارج كيطالب بالحق في الصحة، بينما شباب شبعانين بروتين وكرياتين كيقراو في مدارس عليا لابسين مزيان سجل الغياب عندهم مافايتش نص نهار من التحضيري حتى للباك، وحتى هوما خارجين كيطالبوا بالصحة والتعليم، علما ان سبيطار الدولة مكيعرفوهش فين جا، هاد الشباب المثقف الواعي لي كابر بالانترنيت إما مغرر بيه إما واكل الفصة.
الاحتجاج على أيتها حاجة ضرات الواحد راه أمر صحي وهو لي كيميز المجتمعات الحرة والمتقدمة على المجتمعات المتخلفة، راه ميريكان لي اعظم دولة في تاريخ البشر وفيها اكبر الجامعات واشهرهم وأجودهم، وفيها أكبر عدد ديال الفائزين بنوبل والفائزين بالميداليات الأولمبية، ومع ذلك راه كيخرجوا فيها مظاهرات بشكل يومي كل واحد وعلاش، كاين لي خارج من توفير مكان لنزول المسيح والاستعداد ليوم القيامة، ها اليمين ها اليسار لي مع المهاجرين لي ضدهم، هادي هي قوة المجتمعات الحرة في اختلافها وحرية افرادها، هنا راه موشكيل كبير ان بنادم مكيخرج على الحاجة لي ضاراه بصح، ديما أي واحد واصلة فيه للعظم من شي قضية خاصة، فاش كيخرج للشارع كتلقاه كيغوت وبغينا الصحة والتعليم وبغينا الحقوق، فاش تسولوا شناهوما الحقوق لي باغي غادي يبدى يبحلق فيك.
دابا لنفرض أن شي حد من الحكومة نزل عند هاد الدراري وقاليهم آشنو بغيتو اسيدي شنو مطالبكم، جاوبوه كي العادة بصوت جماعي بغينا الصحة والتعليم والحقوق، وعاود سولوهم بالنسبة ليكم كي غادي نديرليها وشنو لي متضررين منو بالظبط، فاش كتقول الصحة راه قطاع كبير وفيه عدة اطراف، مثلا مناش كنشكاو واش من الأطباء السلايتية لي يقدرو يكونوا في نفس الوقت واليديكم لي كيسلتوا باش يخدموا في الخاص ويلقاو باش ياخدو ليكم تيشورطات مقطعين ديال آيسي دي سي من زارا وبيرشكا وبول ان بير، واش الأطباء كاينين ولكن الماتريال مكاينش، واش مشكل ديال الرونديفوات الطوال في المدة، شنو الموشكيل بالظبط، وكذلك مع التعليم وباقي القطاعات، هاد الشعارات الفضفاضة معطاتش نتيجة في عشرين فبراير وقبل منها وماغاديش تعطي نتيجة دابا، هاعلاش النضالات الفئوية كتبقى محترمة ومباشرة، بحال الشباب لي خرجوا خاصهم پيسري في بن حمد، او شباب حركة مالي خارجين بالظبط ضد فصل عارفينو ومحددينو، راه هادشي لي كيخلي أي واحد يشك في هاد الحماس الزائد عند الشباب، كيفاش مخليين لي كيضرهم حقا وهو حرياتهم وحياتهم وخارجين من اجل مطالب بعيدة عليهم.