وكالات//
تحوّلات واحد الرحلة جوية كانت غي ترفيهية لفوضى كبيرة، من بعدما اضطر الربّان ديال طيّارة تابعة لشركة “رايان إير” يبدّل المسار ديالها ويهبط اضطرارياً فمدينة تولوز الفرنسية، بسبب تصرفات مشاغبة من طرف مجموعة ديال البريطانيين اللي كانوا دايرين حفلة توديع العزوبية فوق الطيّارة اللي كانت غادية من لندن نحو أليكانتي فإسبانيا.
الفوضى بدات منين أقلعت الطيّارة، حيث هاد المجموعة بدات كتشرب الشراب اللي جابوه معاهم، وكانو كيهضرو بصوت عالي وكيقولو كلام خايب، الشي اللي خلى العائلات اللي راكبة ومعاهم دراري صغار يتقلقو. ورغم أن الطاقم ديال الطيّارة حاول يهدّي الموقف، إلا أن الأمور تزادات سوء، وولات كاين عراك عنيف حتى تقطعات حوايج شي واحد منهم، وكانو شي وحدين كيركلو الكراسة وكيحطّو رجليهم فوق روس الركاب.
واحدة من الركّاب، سميتها تانيا نيكولز، حكات لصحيفة “ديلي ميل” بلي المشاكل بدات منين طلعو فالطيّارة، حيث ماحترموش تعليمات السلامة، وبدلو البلايص بيناتهم ودارو صداع بلا ما يوقف. وقالت بلي واحد منهم حتى بدا كيتحرش براكبة، ولكن الطاقم تدخل ورجعو لبلاصتو.
منين ولات الحالة خارجة على السيطرة، الربان علن بلي الرحلة غادي تتحول لمطار تولوز، وفاش وصلو، لقاو البوليس الفرنسي كيستناهم. منين وقفات الطيّارة، طلعات البوليسية وبدّاو كيخرجو هاد الناس اللي دايرين الفوضى، واحد بواحد، بالرغم من أنهم كانو كي قاومو. وتصوّرات لقطات فيديو كيبان فيها العراك اللي كان بين راكب واحد والبوليس، حتى جبدو من بلاصتو بمساعدة ولدو. وباقي الركاب صفقو منين خرجو هاد المجموعة كاملة.
وفي بلاغ رسمي، قالت شركة “رايان إير” بلي الهبوط الاضطراري وقع نهار 26 شتنبر، بسبب “سلوك ماشي منضبط” من طرف مجموعة صغيرة من الركاب، وأكدات بلي الشركة عندها سياسة صارمة وما كتسامحش مع التصرفات اللي كتخلق الفوضى أو كتعرض الركاب للخطر. ودابا السلطات الفرنسية بدات تحقيق فهاد الحادث.